ئەو گەنجەی رێگری لە سوتاندنی قورئانی پیرۆز کرد لە نەرویج، باسی روداوەکە دەکات و دەڵێت پۆلیس وتویانە ناهێڵین قورئانی پیرۆز بسوتێنن بەڵام رێگریان نەکرد.

ئەو گەنجە رایگەیاندوە ناوی عومەر دەباعایە و خەڵکی وڵاتی سوریایە.

ئاماژەی بەوەشکرد پێشتر پۆلیس گرەنتی بەوانداوە، رێگری لە سوتاندی قورئانی پیرۆز بکەن لەلایەن سەرۆکی ئەو گروپەوە، بەڵام سەرۆکی گروپەکە بەچەند چرکەیەک گڕی لە قورئانەکە بەردا و پۆلیسیش رێگریان نەکرد، بۆیە ئەو خۆی ئەو هەوڵیداوە قورئانەکە بکوژێنێتەوە.

وتوشیەتی، پاش هەوڵەکەی ئەو، ئینجا پۆلیس جوڵەی کردوە و ئەویشیان دەستگیرکردوە.

لەچەند رۆژی رابردوودا لە شاری کریستان سانی نەرویج، گروپێکی راستڕەو بەناوی "رێگریکردن لە بە ئیسلامکردنی نەرویج" گردبونەوەیەکیان رێکخست و سەرۆکی گروپەکە لارست تورسان گڕی لە قورئانی پیرۆز بەردا بەڵام لەلایەن ئەم گەنجەوە رێگری لێکرا.