نوام چۆمسکی، فەیلەسوف و نوسەری ئەمریکی پێی وایە بژاردەیەکی باشە ئەگەر دژی هێرشەکانی تورکیا بۆسەر ڕۆژئاوای کوردستان بایکۆتی کاڵای تورکی بکرێت و ئەوەش دەبێتە هۆی خورانی ئابووری تورکیا.

چۆمسکی لە لێدوانێکیدا سەبارەت بە هێرشی تورکیا بۆسەر ڕۆژئاوا دەڵێت "ئێستا تورکیا خەریکی کورد کوشتنە" داواش لەسەر جەم هونەرمەند، بیرمەند، سینەماكاران و ڕۆشنبیرانی جیهان دەكات، کە دژی هێرشەكانی تورکیا، بایكۆتی كاڵای توركی بكەن و مامەڵەی پێوەنەكەن.

ئەو فەیلەسوفە ئەمریکییە دەڵێت " ئەگەر بایكۆتی كاڵای توركی بكرێت و بازارەكان بە بێ بەرهەمی توركی بمێنێتەوە، توركیا توشی خورانی ئابووریی دەبێت، بۆیە  تا  پاکتاوی نەژادیی لەلایەن ئەو دەوڵەتەوە ڕانەگیردرێت، پێویستە توركیا بخرێتە ژێر فشارێكی نێودەوڵەتییەوە".

نوام چۆمسکی، زمانناس و فەیلەسوفی ئەمریکی پێشتریش چەندجارێک لەسەر مافی کورد و پێشێلکارییەکانی تورکیا دژی کورد هەڵوێستی هەبووە، لە ساڵی ٢٠١٦ دا چۆمسکی داوایەکی سەرۆککۆماری تورکیای ڕەتکردەوە بۆ سەردانی ئەو وڵاتە و وتی "ئەگەر سەردانی تورکیا بکەم بۆلای کوردە قارەمانەکان دەچم نەک ئەرۆغان".

ئاورام نوام چامسکی  زمانناس، فەیلەسوف ئانارشیست و تێۆری دانەری ئامریکایی یە  بە باوکی زمانناسی مۆدێرن دەناسرێ تا پێش تیۆریەکانی ئەو لە ماهیەتی (چۆنیەتی) زمان و چۆنیەتی فێربوونی زمان لە لایەن مرۆڤەوە دەرکێکی درووست بوونی نەبوو، وتارەکان و کتێبەکانی نوام چامسکی دەسپێکەری لێکۆڵینەوەکانی نوێ لە بواری زمانناسیدابوو.