ترەمپ گلەیی لە کورد دەکات

09:09 - 10/10/2019
جیهان

سەرۆکی ئەمریکا گلەیی لە کورد دەکات و دەڵێت، کوردەکان لە جەنگی دووەمی جیهانی و شەڕی نۆرماندی هاوکاری ئەمریکایان نەکردووە، بەڵام هێشتا ئەمریکا کوردی بە دڵە.

دوای دەستپێکردنی هێرشی تورکیا بۆسەر رۆژئاوای کوردستان، دۆناڵد ترەمپ، سەرۆکی ئەمریکا، رایگەیاند "کوردەکان لە جەنگی دووەمی جیهاندا هاوکاری ئێمەیان نەکردووە، ئەوان لە نۆرماندی هاوکاری ئێمەیان نەکردووە، بەڵام ئێمە لە رووی پێدانی چەک و پارەوە هاوکاریمان کردوون و سەرباری هەموو ئەمانەش ئێمە هێشتا کوردمان بە دڵە".

راشیگەیاند، کورد لە پێناو خاکی خۆیان شەڕدەکەن.

 

پێشتریش ترەمپ، رایگەیاند، " کورد بەرامبەر چەک و پارە شەڕی بۆ کردووین."

 

دوای ئامادەکارییەکانی تورکیا بۆ هێرشکردنەسەر رۆژئاوای کوردستان، رۆژی دووشەممە، ئەمریکا هێزەکانی لە دوو خاڵی ناوچەی ئارام لە حەسەکەی سەر بە کانتۆنی جەزیرە و تەل ئەبیەز لە رۆژئاوای کوردستان کشاندەوە.

 

دوێنێش تورکیا هێرشی سەر رۆژئاوای کوردستانی دەستپێکرد و دواتر وه‌زاره‌تی به‌رگریی توركیا ڕایگەیاند، لەگەڵ چەکدارانی هاوکاری سوری ئۆپراسیۆنی زەمینیان دەستپێکردووە و دەچنە ناو خاکی سوریاوە و تاوەکو ئێستا هێرشی ئەو وڵاتە بۆسەر رۆژئاوا بەردەوامە.

7478 جار خوێندراوەتەوە