عادل عەبدولمەهدی: گفتوگۆ لەگەڵ خۆپیشاندەران دەکەین

11:14 - 06/10/2019
عێراق

سەرۆک وەزیرانی عێراق رایگەیاند، "دەچمە ناو خۆپیشاندەران و گوێیان لێدەگرم و بە هیچ شێوەیەک نابێت تەقە لە خۆپیشاندەران بکرێت"

 

عادل عەبدولمەهدی سەرۆک وەزیرانی عێراق لەکاتی کۆبوونەوە لەگەڵ ژمارەیەک بەرپرسدا رایگەیاند، "رێنماییەکانی مەرجەعییەت جێبەجێدەکەین و سەرجەم هێزە ئەمنییەکان پابەندن بە پاراستنی سەرو ماڵی هاوڵاتییان و نابێت بە هیچ شێوەیەک تەقە لە خۆپیشاندەران بکرێت."

 

ئاماژەی بەوەشکرد، دەرگای گفتوگۆیان لەگەڵ خۆپیشاندەران کردووەتەوە و دەچێتە ناو خۆپیشاندەران و گوێیان لێدەگرێت.


روونیشیکردەوە، چاکسازییە راستەقینەکان پێشکەشی پەرلەمان دەکەن و حکومەت جدییە بۆ ئەنجامدانی چاکسازی تاوەکو ئێستا هەزار فەرمانبەریان لەسەر گەندەڵی دوورخراونەتەوە.

 

لە ماوەی چەند رۆژی رابردوودا، خۆپیشاندان و ناڕەزایەتیی دژ بە گەندەڵی، بێكاری و خراپی خزمەتگوزارییەكان شاری بەغدا و چەند شارێكی باشوری عێراقی گرتەوە و تاوەکو ئێستە بەردەوامە، لە خۆپیشاندانەکاندا ئاڵۆزی لە نێوان خۆپیشاندەران و هێزە ئەمنییەكاندا روویدا و بە هۆیەوە تا ئێستا زیاتر لە ١٠٠ كەس كوژراون.

624 جار خوێندراوەتەوە