بۆ یەکەمجار، لە میدیاکانی عێراقەوە چەند وێنەیەکی دەگمەنی تارق عەزیز وەزیری دەرەوە و سوڵتان هاشم وەزیری بەرگری ڕژێمی پێشووی عێراق لە زینداندا بڵاوکرایەوە.

بەپێی ئەو وێنانەبێت کە میدیا عێراقییەکان بڵاویانکردووەتەوە، لە رێگەی کامێرای چاودێری ئەو زیندانەی هەریەک لە تارق عەزیز و سوڵتان هاشمی تێدابووە بۆ یەکەمجار چەند وێنەیەکیان بڵاوکراوەتەوە، بەڵام دیارنییە کێ ئەو وێنانەی گرتووە و چۆن دزەیان پێکراوە.

سوڵتان هاشم ئەحمەد وەزیری بەرگریی ئەوکاتی عێراق کە لە دایکبووی ساڵی ١٩٤٥ی موسڵە، لەلایەن دادگای باڵای تاوانەکانی عێراقەوە بە چوار سزای لەسێدارەدان، و دوو سزای زیندانی هەتاهەتایی، وسزایەکی ١٥ ساڵ زیندانیکردن سزادراوە.

هەرچی تارق عەزیزە لە ساڵی ١٩٣٦ لەدایکبووە و  لە ساڵانی سەرەتای هەشتاكاندا وەزیری دەرەوەی عێراق بووە و دواتر جێگری سەرۆك وەزیرانی عێراقی بووە.

لە ٢٦ ی ١١ی ٢٠١٢ دادگای باڵای تاوانەكانی عێراق، بە تۆمەتی سەركوتكردنی پارتە ئاینییەكانی عێراق بڕیاری لەسێدارەكانی بەسەردا سەپاند، بەڵام بەهۆی بە نەخۆشی و زۆری تەمەنییەوە بڕیارەكە جێبەجێ‌ نەكرا و رۆژی هەینی ٥ ی ٦ی  ٢٠١٥ لە نەخۆشخانە کۆچی دواییکرد.