ڤیدیۆ... ژنێکی کوردی ١٠٥ ساڵان نهێنی تەمەنە زۆرەکەی ئاشکرادەکات

05:44 - 25/08/2019
هەمەڕەنگ

دڵبه‌ر كاراهان، ژنێکی تەمەن ١٠٥ ساڵی کوردی باکوری کوردستانە و لە لادێکانی پاریزگای ئاگری دەژی.

 

 ئەو لەبارەی تەمەنی درێژییەوە دەڵیت نهێنی ئەمە پەیوەندی بە خواردنی سرووشتی و خەوی ڕێک و جوڵەی بەردەوامی لەناو لادێکەیانەوە هەیە.

 

دڵبەر كاراهان كه‌ له‌ گوندی كاغنیڵی کە ٢٥ كیلۆمەتر له‌ شارۆچكه‌ی تاشڵیچای دووره ده‌ژی له‌ ساڵی ١٩١٤ له‌دایكبووه‌ و له‌ ساڵی ١٩٣٤ له‌گه‌ڵ موحیدین كاراهان هاوسه‌رگیری كردووه‌ و حه‌وت كچی هێناوه‌ته‌ دونیاوه‌‌. به‌ تێپه‌ڕبوونی كات پێنج له‌ كچه‌كانی كۆچی دوایی ده‌كه‌ن و ساڵانێك له‌مه‌وبه‌ریش هاوسه‌ره‌كه‌ی كۆچی دوایی كردووه‌.

 

ئەو دوای ئه‌وه‌ی دوو كچه‌كه‌ی هاوسه‌رگیریان كردووه‌ به‌ ته‌نیا له‌ گونده‌كه‌یاندا ژیان به‌سه‌ر ده‌بات و سه‌ره‌ڕای چوونه‌ ته‌مه‌نه‌وه‌ خۆی كاروباره‌كانی ژیانی به‌ڕێ ده‌كات.

كاراهان خاوه‌ن ٢٥ نه‌وه‌یه و منداڵی نه‌وه‌كانیشی بینیوه‌ و به‌ ته‌مه‌نترین كه‌سی گونده‌كه‌یانه‌.

دڵبەر كاراهان باسی له‌وه‌ كرد كه‌ تا ئه‌مڕۆ گرنگیی به‌ خواردنی سروشتی داوه‌ و زیاتر رووه‌كی خواردووه‌ و خۆی له‌ خواردنی شیرینی پاراستووه‌ و گوتی: ''له‌ كۆندا ژیان زۆر سه‌خت بوو. ده‌خڵمان هه‌باشه‌ ده‌كرد. به‌ ده‌سته‌كانمان گه‌نم و جۆمان جیاده‌كرده‌وه‌، جاران نانی گه‌نم لای هه‌موو كه‌س نه‌بوو، له‌و سه‌رده‌مه‌دا نانی جۆ هه‌بوو. ئێمه‌ به‌ نانی جۆ گه‌وره‌بووین.

4031 جار خوێندراوەتەوە