بزوتنەوەی گۆڕان بزوتنەوە و هێزێک لە دروستبونیەوە جیاواز و نامۆ بە شێوازی حوکمڕانی و حزبی لە هەرێم دەرکەوت،  بۆیە لەلایەن دوو هێزی باڵا دەستی هەرێمەوە زۆرترین دژایەتی کراو زۆرترین هێرشی کرایەسەر تا ڕادەی تەخوین کردن و دوژمنایەتی و توانای قبوڵکردنیان نەبوو وەک هێزێکی نوێی کاریگەر.

ئەمەش بوە هۆکار کە کاردانەوەیان ترساندن و هەڕەشە و سزادان و نانبڕاو کردنی هەموو ئەوانە بێت کە پاڵپشت و هەڵگری بیری گۆڕان و گۆڕانکاری بوون و ساختەکاری لە هەڵبژاردن و تەنانەت هێرشکردنە سەر بارەگاکانی گۆڕان؛ نمونەی ترس و دوژمنایەتی بوون نەک ململانێی سیاسی قبوڵکراو.

دەکرێت بڵێین ترس لە گۆڕان دوو ترس بوو:
یەکەم/ پێش ئەوەی ترس بێت لە بزوتنەوەکە وەک حزبێکی سیاسی، ترس بوو لە بیر و ڕێبازی نەوشیروان مستەفا و بیری گۆڕانکاری و هۆشیاری و بەئاگاهێنانەوەی تاکی کورد (ئایدیای گۆڕان).
دوەم/ پاشان ترس بوو لە بزوتنەوەی گۆڕان وەک هێزێکی سیاسی و دەرکەوتنێکی نوێ لەهەرێمی کوردستان و عێراق و ناوچەکەش.

ئەمەش بەجۆرێک لە بەیەکدادانی دوو بەهای جیاواز وێنا دەکرێ، "بەیەکدادانی شارستانیەکان" ئەگەر بۆ دوو شارستانی و کۆمەڵگای جیاواز و جۆراو جۆر بێت ئەوا دروستبونی بزوتنەوەی گۆڕان بەیەکدادانی دوو بەها و دوو بیر و دوو نەوەو بیرکردنەوەی جیاواز بوون لە یەک کۆمەڵگا و یەک شارستانیەتدا.

ناکرێ ناوی بنێین ململانێی نەوەی کۆن و نەوەی نوێ،  بەڵام گومانی تێدا نیە بەیەکدادانی دوو بیرکردنەوەی جیاواز دوو بەرەی جیاوازبوون بۆ شێواز و جۆری حوکمڕانی کردن:

بەرەی یەکەم، بەرەیەک بۆ دەرچون لە ژێر حوکمڕانی گەندەڵی و نادادی کۆمەڵایەتی و نایەکسانی و سەروەرنەبونی یاسا، وەک بەرەیەکی نیشتمانی.

بەرەی دووەم، بەرەیەک بۆ مانەوە یاخود هێشتنەوە لە ژێر هەژموونی حوکمڕانی پڕ گەندەڵی و نادادی و نایەکسانی و سەروەر نەبونی یاسا، وەک بەرەیەکی نا نیشتمانی.

لەگەڵ هەموو ئەو دژایەتیانەی بەرەی دووەم بۆ بەرەی یەکەم؛ لە دواجاردا بەرەی یەکەم  سەرکەوتوبوو لە گەیاندنی پەیامەکەی، کەواتە بەرەی نیشتمانی بۆ حوکمڕانی و بیری گۆڕان و گۆڕانکاری تەپڵی سەرکەوتنی لێدا، دوور لە چەندێتی کورسی پەرلەمانی و قەبارەی حزب.

بەرەی دووەم کاتێک دەبینێت و گومانی نەما لە سەرکەوتنی بیری گۆڕان و گۆڕانکاری و بیر و ڕێبازی ڕەوانشاد نەوشیروان مستەفا، کەوتەخۆ بۆ گەڕێکی تری دژایەتی و دوژمنایەتی داینەمۆ و دروستکەری بیری گۆڕانکاری و نەوشیروان مستەفا کە بزوتنەوەی گۆڕان نمایندە و ڕێبەر و جێبەجێکاری ئەم بیر و ڕێبازە سەرکەوتوەیە.

لێدان لە دوا پڕۆژەی سیاسی نەوشیروان مستەفا لێدانە لە ئەو (نا)یە گەورەیەى دژ بە ناشەفافی و گەندەڵی بەرزکرایەوە، لێدانە لە خودی بزوتنەوەی گۆڕان و هەوڵدان بۆ بچوک کردنەوەی و تەنانەت سڕینەوەی لە گۆڕەپانی سیاسی. 

گەڕی دووەمی دژایەتی کردن و سڕینەوەی بیری گۆڕانکاری

ئەگەر چی لە دوای ساڵى (2009)ـەوە هیچ کات دەسەڵاتداران دەستیان لە دژایەتی گۆڕان و بیری گۆڕانکاری هەڵنەگرتوە، بەڵام کۆمەڵێک هۆکار دروست بوون تا گەڕێکی جیاواز تری دژایەتیان دەست پێبکەن، دۆخگەلێک کە ڕێگە خۆشکەر و کۆسپی کەمتر بوو بۆ لێدان لە ئایدیای گۆڕان، کۆچی دوایی ڕەوانشاد نەوشیروان مستەفا، دۆخە خراپە ئابوریەکەی خەڵک و کێشەی هەرێم و ناوەند و نەبونی موچە،  بونی هێزی زۆر و چەندین کەناڵی ڕاگەیاندنی زەبەلاحی خۆیان و داراییەکی بێ شوماری حزب و بونی دەیان میدیای سێبەر و پەیج و ئەکاونتی بە پارە کڕدراو، دۆخی خراپی دارایی گۆڕان و نەمانی تاکە کەناڵی ڕاگەیاندن، هاوکار و ڕێخۆشکەر بوون بۆ بەجێهێنانی مەرام و ئامانجیان و دەستپێکردنی گەڕی دووەمی دژایەتی بیری گۆڕانکاری و کارکرن لەسەر سۆز و عەتفی خەڵک.

ئەوانەی تا دوێنێ دژایەتی نەوشیروان مستەفا و بیری گۆڕانکاریان دەکرد ئەمڕۆ بە شێوازێکی تر دژایەتی دەکەن.

بەڕشتنی فرمێسکی تیمساحی بۆ کاک نەوشیروان و لە پاڵیشیدا فڕێدانی چەندین ڕستەی دروستکراوی وەک "گۆڕان دوای نەوشیروان مستەفا نەما" و "گۆڕان لە بنەماکانی خۆی لایداوە" و "گۆڕانی ئێستا و گۆڕانی سەردەمی نەوشیروان مستەفا" و چەندانی تر کە ڕۆژانە هەڵدەدرێنە ناو سۆشیال میدیا و پەیج و سایتە فەیک و دروستکراو و بە پارە کڕدراوەکانیان، ئەوانە ئەوەندەی لێدانن لە بزوتنەوەی گۆڕان ئەوەندەش لێدانن لە بیرو ڕێبازی گۆڕانکاری و نەوشیروان مستەفا.

ئەوان هیچ کات نایەن ئەو ڕاستیە بڵێن کە گۆڕان هەر ئەو گۆڕانەی جارانە و دۆخەکە جیاوازە و تاکە مەترسیە بۆ بەرژەوەندیە شەخسی و حزبی و کۆمپانیاکانیان.

هیچ کات پێ لەو ڕاستیە نانێن کە ئێستاش گۆڕان خاوەنی هیچ کۆمپانیایەکی بازرگانی نەوت و قاچاخچێتی لە خاڵە سنوریەکان نیە.

ئێستاش بزوتنەوەی گۆڕان هەر ئەو گۆڕانەیە هەموو بارەگا و مەکۆکانی خۆبەخشانە بەڕێوە دەبرێن.

ئێستاش ئەندامانی خانە و جڤاتەکەی (سەرکردایەتیەکەی) نەک ڕیزە ئۆتۆمبێلی موڵکی گشتی و حزبییان بەدواوە نیە، بەڵکو  بێ پاسەوانن و بێ موچەی حزبین.

کامە وەزیری پشکی گۆڕان بە قەد مسقاڵێک گەندەڵی کردوە و گۆڕان لێی بێ دەنگ بوە، ئەی کامە گۆڕانە فراکسیۆنەکەی داوای کردوە هەموو وەزیرەکان بانگهێشتی پەرلەمان بکرێن لە پێش هەموان وەزیرەکانی گۆڕان.

کامە گۆڕانە ئەندامانی فراکسیۆنەکەی تاقانەن لەناو پەرلەمان لە ئاشکراکردنی دزی و قاچاخچێتی سنورەکان و خاڵە گومرگیەکان بە زەبری هێز. کەواتە بۆ ئەمان هەمان مەترسی لەسەریان ماوە و دژایەتیکردنی بە ئەرک دەزانن.

ئێستاش لە سۆشیال میدیا و ڕاگەیاندنەکان و ڕووداو و بۆنەکاندا ئەندامان و هەڵسوڕاوان و سەرکردایەتیەکەی هەمان هەڵوێستی پێشوتریان هەیە و گۆڕانی تێدا نەبوە، کەواتە دژایەتی کردنی بە کاری خۆیان دەزانن.

ئێستاش بزوتنەوەی گۆڕانە لە هەموو پرسە نیشتمانی و نەتەوەییەکان هەمان هەڵوێست و ئامانجی پێشوی نەگۆڕیوە.

ئەوەی گۆڕاوە شێوازی لێدان لە بزوتنەوەی گۆڕان و هێرشەکانی سەرێتی و گەڕی دووەمی دژایەتی بیری گۆڕانکاریە لە ڕێگای لێدان و هەوڵدان بۆ بچوککردنەوەی بزوتنەوەی گۆڕان و بێ ئومێدکردنی خەڵک لە گۆڕان و بیری گۆڕانکاری.