بەهۆی ئەو شەپۆلە بەخوڕەی بارانبارین کە هەرێمی کوردستانی گرتووەتەوە، ئاستی لێڵبوونی ئاوی ڕووبار بەشێوەیەکی بەرچاو بەرزبووەتەوە، بەو هۆیەوە هەر سێ پڕۆژەی ئاوی ئیفراز و فریاگوزاریی خێرا لە هەولێر ڕاگیران.

بەڕێوەبەرایەتیی ئاوی هەولێر ڕایگەیاند؛ بەهۆی بارانبارینەوە ئاستی لێڵبوونی ئاو گەیشتووەتە (12.400 NTU) و لە بەرزبوونەوەشدایە، ئەمەش وایکردووە لە توانای تەکنیکیی وێستگەکانی پاڵاوتندا نەمێنێت ئاوەکە پاک بکەنەوە. لەپێناو سەلامەتیی تەندروستیی هاووڵاتییان، هەر سێ وێستگەی (ئیفراز 1، 2 و 3) لەگەڵ وێستگەی فریاگوزاری بەشێوەیەکی کاتی ڕاگیراون.

ئاماژەی بەوەشکردووە؛ بۆ چەند کاتژمێری داهاتوو دابەشکردنی ئاو لەڕێگەی کۆگاکانی ئاوەوە بەردەوام دەبێت. تیمەکانیشیان چاودێریی ڕێژەی لێڵبوونی ئاوەکە دەکەن و هەرکاتێک ئاستەکەی نزم بووەوە بۆ دۆخی ئاسایی، وێستگەکان دەخرێنەوە کار و دابەشکردنی ئاو ئاسایی دەبێتەوە.