جێگری سەرۆکی حکومەتی هەرێمی کوردستان، کشانەوەی هێزەکانی هاوپەیمانان و گەڕانەوەی سەروەریی تەواو بۆ عێراق بە "ساتەوەختێکی مێژوویی" ناو دەبات و ڕایدەگەیەنێت، هێزی پێشمەرگە لەوپەڕی ئامادەییدایە بۆ پاراستنی خاکی کوردستان و سەروماڵی هاوڵاتییان لە هەر هەڕەشە و مەترسییەک.

قوباد تاڵەبانی، جێگری سەرۆکی حکومەتی هەرێمی کوردستان، لە پەیامێکدا بەبۆنەی کۆتاییهاتنی ئەرکی هاوپەیمانیی نێودەوڵەتی لە عێراق و هەرێمی کوردستان، سوپاس و پێزانینی بۆ ئەو هێزانە دەربڕی کە لە شەڕی دژ بە تیرۆردا هاوکاریی پێشمەرگە و سوپای عێراقیان کردووە. ئاماژەی بەوەش کرد، گەلەکەمان هاوکارییەکانی هاوپەیمانان لە سێ قۆناغی چارەنووسسازدا لەبیر ناکات، کە بریتین لە ڕاگەیاندنی ناوچەی دژەفڕین لە ساڵی 1991، ڕووخاندنی ڕژێمی بەعس لە ساڵی 2003، و شەڕی دژ بە تیرۆریستانی داعش لە دوای ساڵی 2014.

تاڵەبانی جەختی لەوە کردەوە کە لەم قۆناغەدا بەرپرسیارێتییەکی گەورە دەکەوێتە سەر شانی حکومەتی فیدراڵی، حکومەتی هەرێم و سەرجەم هێزە سیاسییەکان بۆ سەلماندنی توانای پاراستنی ئاسایش و سەروەریی وڵات بە کۆمەڵگەی نێودەوڵەتی. ڕوونیشیکردەوە کە ئەم ئەرکە بەبێ پێکەوەکارکردن و جێبەجێکردنی تەواوەتیی دەستوور بەدی نایەت.

لە بەشێکی دیکەی پەیامەکەیدا، جێگری سەرۆکی حکومەت داوای لە هێزە سیاسییەکانی کوردستان کرد بە یەکڕیزی کار بکەن بۆ بەهێزکردنی دامەزراوە شەرعییەکان و هەنگاونان بەرەو حکومڕانییەکی باشتر و دادپەروەرتر، چونکە دەستکەوتەکان تەنها بە متمانەی هاوڵاتییان دەپارێزرێن. لە کۆتاییدا دڵنیایی بە هاوڵاتییان دا کە هەماهەنگییەکی زۆرباش لەنێوان هەولێر و بەغداد هەیە و هێزی پێشمەرگەش بەتەواوی ئامادەیە بۆ بەرگریکردن لە خاکی کوردستان بە گیانفیدایی.