بەڕێوەبەرایەتیی نەوت و کانزاکانی هەولێر بڕیاریدا ڕاگرتنی ئۆتۆمبێل لەبەردەم بەنزینخانەکان بەمەبەستی نۆرەگرتن لە شەواندا قەدەغە بکات و هۆشداریی سزادانیش دەداتە سەرپێچیکاران.
بەپێی ئاگادارییەکی بەڕێوەبەرایەتیی نەوت و کانزاکانی هەولێر کە ئاراستەی گشت هاووڵاتییان کراوە، ڕاگرتنی ئۆتۆمبێل لەپێش بەنزینخانە، شەقام و کۆڵانەکاندا بۆ نۆرەگرتنی بەنزین ڕۆژێک پێش دابەشکردنی، بەتایبەتی لە کاتی شەواندا، بە هەموو شێوەیەک قەدەغەیە.
بەڕێوەبەرایەتییەکە هۆشداری دەداتە شۆفێران، لە حاڵەتی پابەندنەبوون و سەرپێچیکردندا، ژمارەی ئۆتۆمبێلەکان لەلایەن بەڕێوەبەرایەتیی هاتووچۆوە تۆماردەکرێن و سزای دارایی (پێبژاردن)یان بۆ دەنووسرێت. لە کۆتاییشدا داوا لە هاووڵاتییان کراوە بە هیچ شێوەیەک ئۆتۆمبێلەکانیان بۆ نۆرەگرتن لە شەقام و کۆڵانەکاندا ڕانەگرن و بەجێی نەهێڵن.
140 جار خوێندراوەتەوە