سەڵاحەدین بابەکر، وتەبێژی یەکگرتووی ئیسلامی کوردستان ڕایگەیاند، پارتی دیموکراتی کوردستان و یەکێتیی نیشتمانیی کوردستان ئامادەییان دەربڕیوە بۆ ئەنجامدانی کۆبوونەوەیەکی لوتکە لەگەڵ سەرجەم ئەو لایەنانەی نوێنەریان لە پەرلەمانی کوردستان هەیە، بەمەبەستی شکاندنی چەقبەستوویی سیاسی، کاراکردنەوەی پەرلەمان، و پێکهێنانی کابینەی نوێی حکومەت.

لە میانی بەشداریکردنی لە بەرنامەی "ڕۆژەڤ"ـی کەی ئێن ئێن، وتەبێژی یەکگرتووی ئیسلامی کوردستان ئاماژەی بەوە کرد، تاوەکو ئێستا کات و شوێنی کۆبوونەوەکە دیاری نەکراوە و ئەوەش بەستراوەتەوە بە کات و بەرنامەی کاری کەسی یەکەمی پارتی و یەکێتییەوە، بەڵام چاوەڕوان دەکرێت لە ڕۆژانی داهاتوودا یەکلایی بکرێتەوە.

ڕوونیشیکردەوە، دوای دیاریکردنی کات و شوێنەکە، بانگهێشتنامەی فەرمی ئاراستەی سەرجەم ئەو لایەنانە دەکرێت کە فراکسیۆنیان لە پەرلەمان هەیە، بۆ ئەوەی بەشداربن لەو کۆبوونەوە گرنگەدا کە تایبەت دەبێت بە گفتوگۆکردن لەسەر کۆی کێشەکانی هەرێمی کوردستان و هەنگاوەکانی داهاتوو بۆ پێکهێنانی کابینەی نوێی حکومەت.