عەلی ئەکبەر ویلایەتی، ڕاوێژکاری ڕێبەری باڵای کۆماری ئیسلامیی ئێران، هۆشدارییەکی توند دەداتە ویلایەتە یەکگرتووەکانی ئەمریکا و ڕایدەگەیەنێت، جووڵەکانی ئەو وڵاتە ناوچەکە بەرەو ئاگر و ئاڵۆزییەکی گەورە دەبەن، هاوکات جەخت لەوە دەکاتەوە کە "بەرەی مقاوەمە" لە بەرامبەر پێشهاتەکاندا دەستی لەسەر پەلەپیتکەیە.

ویلایەتی لە نوێترین لێدوانیدا سەبارەت بە گرژییەکانی ناوچەکە و هەڵوێستی ئەمریکا، ئاماژەی بەوە کرد، داننانی زارەکی بە هەڵوەشاندنەوەی یاداشتنامەی لێکتێگەیشتنەکە ڕاستەوخۆ دەکەوێتە ئەستۆی سەرۆکی ویلایەتە یەکگرتووەکانی ئەمریکا و بەرپرسیارێتییەکەی هەڵدەگرێت.

لە بەشێکی دیکەی قسەکانیدا، ڕاوێژکارەکەی عەلی خامنەیی هۆشدارییەکی توندی دا لەوەی کە بەرەی مقاوەمە لە بەرامبەر ئەو سەرکێشییانەی لە ناوچەکەدا دەکرێن بێدەنگ نابێت و ڕایگەیاند، بەتەواوی ئامادەن و دەستیان لەسەر پەلەپیتکەیە بۆ هەر ئەگەرێک.