پێشبینی دەکرێت لە شارەکانی هەرێمی کوردستان پلەکانی گەرما نزمبوونەوەیەکی ڕێژەیی بەخۆیانەوە ببینن و لە هەندێک ناوچەی شاخاویش ئەگەری بارانبارین و هەورەبروسکە هەیە.

ئاراس جبار، شارەزای کەشناسی لە بڵاوکراوەیەکدا ڕایگەیاند: "ئەمڕۆ شەممە، لە ئەنجامی کاریگەری بارستە هەوایەک کە لە تورکیاوە ڕووی لە ناوچەکانی هەرێمی کوردستان و عێراق کردووە، پلەکانی گەرما بەراورد بە ڕۆژی ڕابردوو بە ڕێژەی 2 بۆ 3 پلەی سەدی نزمدەبنەوە."

ئەو شارەزایەی کەشناسی ئاماژەی بەوەش کردووە، لە کاتەکانی ئێوارە و شەودا، لە هەندێک شوێنی سنووری ئیدارەی زاخۆ و ناوچە شاخاوییەکانی باکووری پارێزگای دهۆک، ئەگەری دروستبوونی هەورەبروسکە و نمەباران بە ڕێژەی 0.5 بۆ 1 ملیمەتر هەیە. هاوکات خێرایی با بە شێوەی مامناوەند دەبێت کە لە نێوان 15 بۆ 30 کیلۆمەتر لە کاتژمێرێکدا دەبێت و ئاراستەکەشی بەرەو باشووری ڕۆژاوا دەبێت.