میدیاکانی بەریتانیا ئاشکرایانکرد، گەورەترین قاچاخچیی مرۆڤ لە ئەوروپا کە بە ڕەچەڵەک کوردە و بە "پاشای قاچاخچییەکان" ناسراوە، لە خاکی بەریتانیا دۆزراوەتەوە، سەرەڕای ئەوەی پێشتر سزادراوە، بەڵام بە ئاشکرا تەحەدای هێزەکانی پۆلیسی ئەو وڵاتە دەکات

بەپێی ڕاپۆرتێکی هاوبەشی هەردوو دەزگای میدیایی (بی بی سی) و (دەیلی مەیل)ی بەریتانی، شوێنی نیشتەجێبوونی ئەو قاچاخچییە کە ناوی "توانا جەمال"ـە و خەڵکی شاری ڕانیەیە، لە ناوچەی لیستەرشێری بەریتانیا ئاشکرا بووە. ڕاپۆرتەکە ئاماژە بەوە دەکات کە ناوبراو لەلایەن ڕۆژنامەنووسانەوە چاودێریی کراوە و دەرکەوتووە بەبێ مۆڵەت ئۆتۆمبێل لێدەخوڕێت

لەبارەی داهات و شێوازی کارکردنییەوە، زانیارییەکان دەری دەخەن کە لە کاتی لوتکەی کارەکانیدا، توانا هەفتانە نزیکەی 100 هەزار پاوەندی پەیدا کردووە و بۆ گواستنەوەی هەر کۆچبەرێکیش بڕی چوار هەزار و 500 پاوەندی وەرگرتووە. هاوکات مانگانە نزیکەی 80 لۆریی پڕ لە پەنابەری ڕەوانەی بەریتانیا کردووە، بۆ دەربازبوونیش لە پشکنین و سەگە پۆلیسییەکان، کۆچبەرەکانی لەناو ئەو لۆرییانەدا شاردووەتەوە کە پیاز و پەنیریان گواستووەتەوە، تاوەکو بۆنەکەی ڕێگری لە ئاشکرابوونیان بکات

لە میانی پەیوەندییەکی تەلەفۆنیدا کە لەلایەن ڕۆژنامەنووسانی (بی بی سی)ـیەوە پێوەی کراوە، ئەو قاچاخچییە کوردە بە متمانەبەخۆبوونێکی زۆرەوە ڕایگەیاندووە: "ئێمە هەموو کەس لەم شارەدا دەناسین، ئەم شارە هی ئێمەیە و پۆلیس ناتوانێت بمانوەستێنێت

پێشینەی کارەکانی ئەم بازرگانە دەگەڕێتەوە بۆ ساڵانی 2012 بۆ 2016 ، کاتێک لە کەمپی "گراند سانت"ـی نزیک شاری دەنکیرکی فەرەنسا، سەرپەرشتیی یەکێک لە گەورەترین تۆڕەکانی قاچاخچێتی کردووە، کە هەر بەهۆی ئەم کارانەشەوە پێشتر لە دادگاکانی فەرەنسا سزای بەسەردا سەپێنراوە.