هێز و پارتە سیاسییەکانی پێکهاتە تورکمان و کریستیانەکان لە هەرێمی کوردستان، دوای کۆبوونەوەیەکی فراوان لە عەنکاوە، داوای کاراکردنەوەی بەپەلەی پەرلەمانی کوردستان و گەڕانەوەی ژمارەی کورسییەکانی کۆتا بۆ دۆخی پێشوویان دەکەن.

لە ڕاگەیەندراوێکی هاوبەشدا، پێکهاتەکان (کەلدانی، سریانی-ئارامی، ئاشووری، ئەرمەنی و تورکمان) داوایان کرد پەرلەمانی کوردستان وەک دەسەڵاتێکی یاسادانانی دەستووری دەست بە دانیشتنەکانی بکاتەوە و پەلە بکرێت لە نووسینەوەی دەستووری هەرێمی کوردستان.

سەبارەت بە سیستەمی کۆتا، پێکهاتەکان داوای گەڕانەوەی 11 کورسییەکەی پێشووی پەرلەمانیان کرد (6 کورسی بۆ کریستیانەکان و 5 کورسی بۆ تورکمان)، بەو مەرجەی دەنگدان بۆ ئەو کورسییانە تەنها لەلایەن ڕۆڵەکانی پێکهاتەکان خۆیانەوە بێت و تۆمارێکی تایبەتی دەنگدەرانیان بۆ دروست بکرێت.

لە بەشێکی دیکەی ڕاگەیەندراوەکەدا، جەخت لە مسۆگەرکردنی بەشداریی کارای پێکهاتەکان لە پێکهێنانی حکومەتی نوێی فیدراڵی لە بەغدا و حکومەتی داهاتووی هەرێمی کوردستان کرایەوە.

ئامادەبووانی کۆبوونەوەکە جەختیان لەوە کردەوە کە پاراستنی مافی پێکهاتەکان و دابینکردنی نوێنەرایەتییەکی ڕاستەقینە، مەرجێکی بنەڕەتییە بۆ چەسپاندنی دیموکراسی و پێکەوەژیان لە هەرێمی کوردستان و عێراقدا.

هاوکات بڕیاریان دا شاندێکی هاوبەش بۆ سەردانی لایەنە سیاسییەکان بەمەبەستی چەسپاندنی ئەو مافانە پێکبهێنن.