عەلی لاریجانی، سکرتێری ئەنجومەنی باڵای ئاسایشی نیشتمانی ئێران رایگەیاند: ئەمریکا و ئیسرائیل پلانی دابەشکردن و هەڵوەشاندنەوەی ئێرانیان هەبووە، بەڵام پلانەکەیان سەری نەگرتووە.
روونیشیکردەوە: لەو چوارچێوەدا پەیوەندییان بە هەندێک گروپی کوردییەوە کردووە و هانیان داون بۆ ئەوەی دژی حکومەت بکەونە جوڵە، بەڵام کوردەکان دەزانن ئەمریکا لە ناوچەکە و بەتایبەتی لە سوریا چ هەڵسوکەوتێکیان هەبووە، هەربۆیە نەکەوتوونە داوی پلانەکانی ئەمریکا.
سکرتێری ئەنجومەنی باڵای ئاسایشی نیشتمانی ئێران ئەوەشی خستەڕوو، کە کوردەکان گەلێکی رەسەن و ریشەداری ئێرانن و رەنگە هەندێک ناکۆکی و داواکارییان هەبێت، بەڵام بە بەڵێنەکانی ئەمریکا لە خشتە نەبران و سیناریۆکەی ئەمریکا سەرینەگرت.
ئەمەش دوای ئەوە دێت کە دۆناڵد ترەمپ سەرۆکی ئەمریکا رایگەیاندبوو: "نامەوێت کورد بچنە نێو ئێران، ئێمە زۆر هاوڕێی کوردین و نامەوێت ببینم کوردەکان ئازار دەچێژن و دەکوژرێن."
لە رۆژانی رابردوودا بڵاوکرایەوە سەرۆکی ئەمریکا پەیوەندی بە بەشێک لە سەرکردە کوردەکانەوە کردووە و حزبەکانی رۆژهەڵاتیش لە ئامادەکاری و چاوەڕوانیدان بۆ گەڕانەوە بۆ ئەو بەشەی کوردستان.