موڕاد قەرەیلان دەڵێت با ئەردۆغان و باخچەلی کە ئاشتیی لەسەر تەرمی ڕۆژئاوا بەدی نایەت و دەبێت دەست لە کورد بەربدەن، تورکیا نەخۆشە و نایانەوێت کورد یەک هەنگاو بنێت بۆ خۆبوونی، تورکیا بە هەموو توانایەکیەوە لە سوریایە کەچی دەڵێن کە دیمەشق داوای لێکردن دەچن بە دەمیانەوە، ئەو پلانگێڕییە مەزنەی دژی کوردە هەرێمی و نێودەوڵەتییە و پێویستە واز لە کورد بهێنرێت.

هەواڵKNNC

موڕاد قەرەیلان فەرمانداری هێزەکانی پاراستنی گەل-هەپەگە ل دیدارێکی میدیاییدا ڕایگەیاند: تورکیا سیاستەێکی خرپا پەیڕەو دەکات و با ئۆردۆگان و باخچەلی بزانن لەسەر تەرمی ڕۆژئاوا ئاشتی بەدی نایەت، دەبێت دەست لە کورد بەربدەن و گۆڕانکاریی لە هزریان بکەن.

فەرمانداری هەپەگە وتیشی، دەوڵەتی تورک نەخۆشە هەرکات کورد تێکۆشان دەکات و هەنگاوێک دەنێت ئەوان دەست بە درۆ دەکەن و کورد دەکەنە دێوەزمە، بۆ هەمووان ڕوونە کێ دژی پێکەوەژیانە و هەوڵی سڕینەوەی بەرامبەر دەدات.

لەبارەی سوریا و ڕۆژئاوای کوردستانەوە وتی، تورکیا ئەڵێت ئەگەر سوریا داوای هاوکارییمان لێبکات یارمەتییان ئەدەین، لە کاتێکدا بەڕاستەوخۆ بە هەموو توانایەوە لە سوریایە و بڕیاردەر و بەشداریی تەواوی ئەوەیە کە ڕوودەدات.

لەبارەی برایەتی گەلانەوە وتی، کێشە لە برایەتی گەلاندا نییە کێش لە سیستمدایە، هۆزە عيرەباکان پێستر خۆیان چوونە لای هەسەدە بیانپارێزێت و کە زانیان ئەمەریکا دەست لە کورد و هەسەدە بەردەدات ئینجا هەڵگەڕانەوە، بەڵام چەندان هۆزی جیا لە کورد هەیە کە بە درێژایی مێژوومان دۆستمانبوون، تورکیا دەیەوێت بەمجۆرە هەم ئاشوب بنێتەوە هەم بابەتی برایەتی گەلان و تەنانەت پڕۆسەکەش کۆتایی پێبهێنێت کە کورد و عەبدوڵڵا ئۆجالان هەنگاوی باشیان تێداناوە، برایەتی گەلان تەنها بۆ کورد نییە و دەبێت نەتەوەکانی دیکەش تیبگەن و نەچنە ژێرباری ئەوەی سیستم و زلهێزەکان دەیانەوێت تا خوێنی زیاتر نەڕژێت، تەنها تورکیا نا بەڵکو هەندێک دەوڵەتی عەرەبییش نایانەوێت برایەتی هەبێت و ڕێگرن لەوەی لە سوریادا پێکەوەژیان هەبێت.

موڕاد قەرەیلان وتیشی، دیزاینکردنەوەی ناوچەکە لە سوریاوە دەستیپێکردوە و کورد و سوریا نزیکبوون لە ڕێککەوتن و دەستوەردان و کۆبوونەوەکەی پاریس هێرش دەستی پێکرد و هەموو شت شێوا، بۆ هەمووان ڕوونە کە پلانەکە مەزنە دژی کورد و تورکیا، سعودیە، ئوردن، ئەمەریکا، بەڕیتانیا، فەڕەنسا لە پلانەکەدان، دەیانەوێت هاوشێوەی کۆماری کوردستان لە مەهاباد لە ئەزموونی ئێستای کورد بدەن، لەگەڵ ئەوەشدا وتی کە کەس کور و هەسەدەی نەکڕیوە تا بمانفرۆشن.

سەرکردەکەی پەکەکە وتی، ئێمە وەک تەڤگەر ڕێکخستنمان لە سوریادا نییە بەڵام هەموو شتێک لەپیناوی گەلەکەمان دەکەین لەهەر جێگەیەک بێت و تا ئەوپەڕیی لەگەڵ گەلی خۆمانین و بەرخۆدان دەکەین بە هەموو شێوەیەک بۆ پاراستنمان.

لە درێژەی قسەکانیدا فەرمانداری هەپەگە وتی، ئەوان بە ئاشکرا دەڵێن ئێمە 15 ڕۆژ کات ئەدەین بۆ گواستنەوەی داعش و دوایی هێرشتان دەکەینە سەر، سوریا نیشانیدا ئەو مافی مرۆڤ و پێکەوەژیانەی جیهان جاڕی بۆ دەدات درۆیەکی گەورەیە و ئەوان پاڵپشتی توندڕەوەکان ئەکەن لەپێناوی پەرژەوەندییان لەبەرامبەر هێزێکی وەک هەسەدە کە شەڕی دژی تیرۆری کرد و 30٪ی سوریای لە داعش پاراست....