شەپۆلی سەرما بەرەو توندی دەچێت و بەفر و کڕێوەی لەگەڵ دەبێت، کەشناسێکیش دەڵێت: زستانی تەواوەتی دەبینین.

هەواڵ:KNNC

کەشناسیی هەرێمی کوردستان پێشبینییەکانی کەشوهەوای بڵاوکردەوە و ڕایگەیاند: ئەمڕۆ و سبەی ئاسمان هەور و باراناویی دەبێت، لە زۆربەی ناوچەکان نمەباران و بارانی مامناوەند دەبارێت، لە بەشێک لە ناوچەکان و بەتایبەت ناوچە بەرزەکان کڕێوە دەبێت واتا بەفروباران پێکەوە، لەگەڵیشیدا خێرایی با زیاد دەکات.

لای خۆشییەوە کەشناس شاڵاو هیدایەت لەبارەی ڕەوشی کەشوهەواوە بە کەی ئێن ئێنی ڕاگەیاند: شەپۆلی ئێستای باران و سەرما سەرتاسەریی دەبێت و لەگەڵیشیدا بەفربارین لە ناوچە سنوریی و بەرزەکان دەستپێدەکات و لە ناوچەکانی دیکەش باران دەبارێت.

لەبارەی شەپۆلی سەرماوە ئەو کەشناسە ئاماژەی بەوەدا، لە سبەینێ یەکشەممەوە سەرمایەکی توند و بەهێز دەستپێدەکات و بارانبارین لە بەشێکی ناوچەکان بەتایبەت ناوچە شاخاوییەکان دەگۆڕێت بۆ بەفربارین، هەر ئەونەش نا بەڵکو بازنەی بەفربارینەکە فراوان دەبێت و بەشێکی دیکە لە ناوچەکان دەگرێتەوە پێشبینیش دەکرێت لە دووشەممە تا کۆتایی هەفتە بەفربارین ناوەندی بەشێک لە شارەکان بگرێتەوە.

شاڵاو هیدایەت ئەوەشی وت کە شەپۆلی ئەمجارە تەواو زستانەیی یە و زستانی سارد و پڕ بەفروباران دەبێت بۆ ناوچەکەمان و کۆی وەزرەکەش وەرزێکی پڕ لە دابارین دەبێت...