ئەمڕۆ هەوری سوپەرسێڵ دەگاتە هەرێمی کوردستان و هۆشداریی دەدرێت.

هەواڵ:KNNC

بارانبارین بەردەوامە و ئاراس جەبار شارەزای بواری کەشناسیی ڕایگەیاند: ئەمڕۆ سێشەممە بۆ  بەرەبەیانی سبەی چوارشەممە هەرێمی کوردستان دەکەوێتە ناو قوڵبوونەوەی کاریگەریی نزمە پاڵەپەستۆی دەریای سوور، کە لەم قۆناغەدا، بارستەهەوایەکی زۆر شێدار لە ناوچەکانی باکووری سعودیەوە دەگاتە ناوچەکانی عێراق و هەرێمی کوردستان، لەگەڵ هاتنی بارستەهەوایەکی سارد و شێداریش، کە لە دەریای ناوەڕاستەوە دێت و زیاتر لە ئاستە بەرزەکانی بەرگەهەوادا کۆدەبێتەوە.

وتیشی ئەمە دەبێتەهۆی دروستبوونی ناسەقامگیرییەکی بەهێز لە کەشی ناوچەکەدا و دروستبوونی هەورەکان لە جۆری کەڵەکەهەوری سوپەرسێڵ بە توندی و هێزی جیاوازەوە لەسەر ناوچە جیاجیاکانی عێراق و هەرێمی کوردستان، کە ئەم جۆرە هەورانەش، بارستە و قەبارەیەکی گەورەیان هەیە بە بارانی زۆر بەهێز و تەرزەی زۆر و هەندێکجار بە تەرزەی گەورەوە دابارینیان دەبێت، کە لە ماوەیەکی کەمدا مەترسی دروستدەکەن لەسەر ئەو ناوچانەی کە لەسەریان دروستدەبێت یان تێپەڕدەبێت بەسەریاندا بەهۆی زۆریی بڕی دابارینەکانیان، کە دەبێتەهۆی دروستبوونی لافاوی خێرا و بەهێز.

لەبارەی کاریگەرییەکەی بۆسەر ناوچەکان ئاراس جەبار وتی، لە زۆربەی ناوچەکانی هەرێمی کوردستان ئەگەری دروستبوونی ئەم جۆرە هەورە هەیە، هەر شوێنە و لە کاتێکی جیاوازدا، واتا کاتژمێرێکی دیاریکراو پێشبینی ناکرێت کە بڵێین کام شوێن و ناوچە لە کام کاتژمێردا بارودۆخێکی لەو جۆرەی بۆ دروستدەبێت، تەنها دەتوانن بڵێن لەو ماوەیەدا هەرێمی کوردستان لەژێر کاریگەریی ناسەقامگیرییەکی زۆری کەشوهەوادا دەبێت.

هەورێكی نزم و تاریك و قەبارە گەورەیە و هەڵگڕی شێیەكی زۆرە، و هەورە بروسكە و بارانی بەخوڕ و تەرزەی پێوەیە، لەگەڵیدا خێرای با زیاد دەکات، بارانی بۆ ماوەی چەند کاتژمێرێک لەخۆگرتوە و بگاتە هەر ناوچەیەک ئەگەری دروستبوونی لافاو هەیە، هەر بۆیە هۆشداریی دراوەتە هاووڵاتییان کە بۆ کاری پێویست نەبێت نەچنە دەرەوە، بە تایبەت ئەو شوێنانەی مەترسییان لەسەرە...