چوارچێوەی هەماهەنگی تاوتوێی دۆسیەی چەند کاندیدێکی کردوە و هەڵبژاردنی سەرۆکوەزیران بە کۆدەنگی دەبێت نەک کورسی زۆر و قورسایی.

هەواڵ:KNNC

چوارچێوەی هەمانەهگی شیعەکان بەردەوامە لە هەوڵەکانی یەکلاکردنەوەی کاندیدێک بۆ سەرۆکوەزیرانی داهاتووی عێراق و لەوبارەیەوە ئەحمەد مەعموری، وتەبێژی فەرمی هاوپەیمانی ئەساس ی عێراق ڕایگەیاند: لیژنەی تایبەت بە پرسەکە کە ئەرکی چاوپێکەوتنە لەگەڵ بەربژێرەکان، تا ئێستا تاوتوێی دۆسییەی نۆ کاندیدی کردووەو، تیشکی خستۆتە سەر بەرنامەکانیان لە بوارەکانی ئاسایش و ئابوری و پەیوەندییە نێودەوڵەتییەکان.

ئاماژەی بەوەشدا، هەڵبژاردنی سەرۆک وەزیران لەسەر بنەمای کۆدەنگی دەبێت کە نوێنەرایەتی هاوپەیمانییەکە بە گشتی بکات، دوور لە هاوكێشەی سەنگ و قورسایی هەڵبژاردن، هاوکات ئەو قورساییانە لە دابەشکردنی وەزارەتەکاندا رەنگدەداتەوە بۆ دەستەبەرکردنی نوێنەرایەتییەکی دادپەروەرانە.

ئەحمەد مەعموری جەختیشی لەوە کردەوە: حکومەتی داهاتوو حکومەتێکی کۆدەنگی هەموو چین و توێژەکانی گەلی عێراق دەبێت، لەگەڵ گرنگیدان بە پابەندبون بە وادە دەستورییەکان.

نزیکی مانگێک بەسەر هەڵبژاردنی پەرلەمانی عێراقدا تێپەڕیەوە شیعە و سوننە هەوڵەکانی خۆیان بۆ دیاریکردنی کاندیدی سەرۆکوەزیران و سەرۆکپەرلەمان چڕکردوەتەوە، پسکی سەرۆککۆماریس کە هی کوردە تا ئێستا هیچ کاندیدێکی لەبارەوەی نەخراوەتەڕوو.