رێكخراوی ته‌ندروستیی جیهانی هۆشداریدا له‌داڕمانی سیستمی ته‌ندروستی له‌سوریاو  ده‌ڵێت پشتیوانیكردنی مرۆیی كه‌رتی ته‌ندروستی ئه‌و وڵاته‌ له‌پاشه‌كشه‌دایه‌.

هەواڵ:KNNC

وه‌ك رێكخراوه‌كه‌ ئاماژه‌ی پێكردوه‌ بڵاوبونه‌وه‌ی په‌تای كۆلێرا له‌ سوریا بوته‌ مایه‌ی هه‌ڕه‌شه‌و حكومه‌تی دیمه‌شقیش ناتوانێت پشتگیری كه‌رتی ته‌ندروستی وڵاته‌كه‌ی بكات.

كریستینا بیسكی هه‌ڵسوڕێنه‌ری كاره‌كانی ته‌ندروستیی جیهانی له‌سوریا رایگه‌یاند: له‌ماوه‌ی دوو مانگی رابردودا و به‌هۆی نه‌بونی پشتیوانیی دارایی بۆ كه‌رتی ته‌ندروستیی نه‌توانراوه‌ چاره‌سه‌ر بۆ 210 هه‌زار حاڵه‌تی پزیشكیی و 122 هه‌زار حاڵه‌تی ده‌رونی و 13.700 حاڵه‌تی منداڵبوون بكرێت  و له‌هه‌مان كاتیشدا به‌هۆی پاشه‌كشه‌ی خزمه‌تگوزارییه‌كانی كه‌رتی ته‌ندروستیی له‌سوریا 7.4 ملیۆن هاوڵاتی له‌به‌ده‌ستهێنانی داووده‌رمان و چاره‌سه‌ر بێ به‌ش ده‌بن.

ئاماژه‌ی به‌وه‌شكردوه‌ كه‌ ته‌نیا له‌ 58%ی نه‌خۆشخانه‌كان و له‌ 23%ی بنكه‌ ته‌ندروستییه‌كان كارده‌كه‌ن و به‌گرانیش ده‌رمان و كاره‌باو كه‌لوپه‌لی پزیشكیان ده‌ستده‌كه‌وێت.