ڤلادیمیر پوتن، سەرۆکی روسیا لە رێوڕەسمێکی تایبەتدا به‌بۆنه‌ی جەژنی رۆژی یەکگرتویی نیشتمانی  كه‌ لە كۆشكی سەرۆكایەتی (كرێملین)، به‌ڕێوه‌چوو خەڵاتی پوشکینی بەخشییە پرۆفیسۆر رەشاد میران، كۆمەڵناس و کەسایەتیی ناسراوی کورد. 

هەواڵ:KNNC

خەڵاتی پوشکین، کە بەناوی ئەلێکساندەر پوشکین، شاعیری گەورەی ڕوسیاوە ناونراوە، لە ساڵی 1999ـەوە پێشکەش بەو کەسایەتیانە دەکرێت کە لە بوارەکانی کولتوری، هونەری و زانستە مرۆڤایەتییەکاندا بەشداریی کاریگەریان لە لێکۆڵینەوە و پاراستن و بەناوبانگکردنی کولتوری روسیادا هەبوە.

پ.د. ڕەشاد میران، یەكێكە لە ئەكادیمیستە دیارەكانی كوردستان و ڕۆڵێكی كاریگەری هەیە لە تۆیژینەوەی زانستیی كۆمەڵناسیدا و هەتا ئێستا سەرپەرشتیی زیاتر لە 15 نامەی ماستەر و تێزی دكتۆرای قوتابیانی بواری كۆمەڵناسی كردووە، خاوەنی چەندین كتێبیشە لەسەر بوارەكانی كۆمەڵناسی و ڕەوشی ئایینی و نەتەوەیی لە كوردستاندا؛ هەروەها یەكێكە لە وەرگێڕە لێهاتووەكان لە زمانی ڕووسییەوە بۆ زمانی كوردی- بۆ نموونە، كتێبی «نەژادی كورد»ی كوردناسی ناوداری سۆڤیەتی «ڤیلچێڤسكی» كردووە بە كوردی. ئەمە بێجگە لە ‌بەشداریكردنی لە دەیان كۆنگرە و كۆنفڕانسی زانستی و ڕووپێویی سۆسیۆلۆگی.