بەرپرسی فەرمانگەی پەیوەندییەکانی ده‌ره‌وه‌ی حکومەتی هەرێم دەڵێت: لە ساڵی نوێوە پەیوەندییەکانی هەرێمی کوردستان و عێراق بەپێی یاسای نوێی بودجە دەبێت و تا ئەو کاتەش هەناردەی نەوت بەردەوام دەبێت.


هەواڵ:KNNC

سەفین دزەیی بەرپرسی فەرمانگەی پەیوەندییەکانی ده‌ره‌وه‌ی حکوومەتی هەرێمی کوردستان لە لێدوانێکی تایبەتدا بە کەی ئێن ئێنی ڕاگەیاند: لە ماوەکانی ڕابردوودا بەپێی یاسای بودجەی ساڵەکانی 2023 و 2024 و 2025 داوا لە هەرێمی کوردستان کرابوو نەوت ڕادەست و هەناردەبکات، بەڵام لە کۆتایی ئەمساڵدا دەگۆڕێت.

سەفین دزەیی وتی لەپاش هەڵبژاردنەکانی عێراق و پێکهێنانی حکومەتی نوێ بابەتی پەیوەندییەکانی نێوان هەرێم و ناوەند گۆڕانکاریی بەسەدا دێت و بودجەی نوێ دیاری دەکات کە پەیوەندییەکان چۆن دەبن.

بەرپرسەکەی حکومەتی هەرێمی کوردستان، دڵنیاییدا لە بەردەوامی هەناردەکردنی نەوتی هەرێمی کوردستان و ئاماژەی بەوەدا، تاوەکو یاسای بودجەی نوێی عێراق پەسەند دەکرێت  و دەچەسپێت هەناردەی نەوت بەو جۆرەی ئێستا بەردەوام دەبێت...

بەپێی ڕێککەوتنە نوێیەکەی نێوان حکومەتی هەرێمی کوردستان و عێراق دەبێت ڕۆژانە هەرێم 230 هەزار بەرمیل نەوت ڕادەستی ناوەند بکات، لەگەڵ 120 ملیار داهاتی ناوخۆی مانگانە، لەبەرامبەردا حکومەتی عێراق کەمتر لە ترلیۆنێک دینار وەک موچەی موچەخۆرانی هەرێمی کوردستان دەنێرێت....