بەپێی داتاكانی كۆمپانیای كێپلەر كە تایبەتە بەكۆكردنەوەی زانیاری لەسەر كەرتی وزە بڵاویكردەوە، لە مانگی ئەیلولی ڕابردوودا عێراق پلەی دووەمی بەدەستهێناوە وەک دووەم گەورەترین هەناردەكاری نەوت بۆ هیندستان .

بەپێی ڕاپۆرتی ئەو كۆمپانیایە  ، ڕوسیا لە مانگی ئەیلولدا پێگەی خۆی وەک گەورەترین دابینکەری نەوتی هیندستان پاراستووە و 33.3%ی کۆی هاوردەکردنی نەوتی هیندستان پێکدەهێنێت.

هەواڵ؛ KNN

بەگوێرەی هەمان سەرچاوە ، هیندستان لە مانگی ئەیلولی ڕابردوودا ڕۆژانە یەک ملیۆن و 600 هەزار بەرمیل نەوتی لە ڕووسیا هاوردەکردووە، لەكتنێكدا لەمانگی ئابی رابردوو بڕی یەك ملیۆن و 700 هەزار بەرمیل نەوتی لەمۆسكۆ كڕیوەو بەوەش لە ڕێژەی 6% کەمبووەتەوە. لەگەڵ ئەوەشدا ڕوسیا وەک گەورەترین هاوردەکاری هیندستان  ماوەتەوە.

ئاماژە بەوەشکراوە، هیندستان هاوردەکردنی لە عێراقەوە بۆ 904 هەزار بەرمیل لە ڕۆژێکدا زیادکردووە، لەکاتێکدا لە مانگی ئابی ڕابردوودا 730 هەزار بەرمیل بووە و لە دوای ڕووسیا پلەی دووەمی گرتوەتەوە و هەرچی سعودیەشە  پلەی سێیەم و ئیمارات پلەی چوارەمی بەدەستهێناوە.

هیندستان سێیەم وڵاتی گەورەترین بەکارهێنەری نەوتە لە جیهاندا و زۆر پشت بە هاوردەکردن دەبەستێت (زیاتر لە 85%). پاڵاوگەکانی هیندستان نەوت لە زیاتر لە ٣٠ وڵات دەکڕن.