نوسینگەى سەرۆک وەزیرانى عێراق رایگەیاند؛ کاردەکەن بۆ گەڕاندنەوەى ئەو هاوڵاتیی و گەشتیارانەى بەهۆى داخستنى ئاسمانى وڵاتەکەوە گیریان خواردوە و دەسەڵاتى فڕۆکەوانى عێراقیش درێژکردنەوەى داخستنى ئاسمانى وڵاتەکەى راگەیاند.

هەواڵ:KNNC

نوسینگەکەى محەمەد شیاع سودانى سەرۆک وەزیرانى عێراق رایگەیاند؛ وەزارەتى گواستنەوەى راسپێردراوە تا لەگەڵ لایەنە پەیوەندیدارەکان لە ئوردن و کوەیت و تورکیا کاربکەن بۆ گەڕاندنەوەى هەمو ئەو گەشتیارانەى لەو وڵاتە گیریان خواردوە.

ئاماژە بۆ ئەوەشکراوە کە دەستەى حەج و عومرە راسپێردراون لەگەڵ وەزارەتەکە کار بکەن بۆ گەڕاندنەوەى دوا کاروانى ئەو حاجیانەى کە ماونەتەوە و دڵنیاببنەوە کە بەسەلامەتى دەگەنەوە خاکى عێراق.


لەلایەکى دیکەوە؛ دەسەڵاتى فڕۆکەوانى عێراق رایگەیاند؛ ئاسمانى وڵاتەکە تا کاتژمێر 1:00ـى دوانیوەڕۆى ئەمڕۆ بە داخراوی دەمێنێتەوە.


لەبارەى هۆکارەکەیەوە ئاماژە بۆ ئەوەکراوە کە بۆ مەبەستى پاراستنى سەلامەتیی فڕۆکە مەدەنییەکانە لە ئاسمانى عێراق و هۆکارەکەیشى ئەو گرژییانەیە ناوچەکەى گرتوەتەوە و لە هەر گۆڕانکارییەکیش گەشتیاران ئاگادار دەکەنەوە.