سەرۆکی هەرێمی کوردستان رایگەیاند، پێشوازی لە بریاری خۆهەڵوەشاندنەوە و چەکدانانی پەکەکە دەکەین، دەشڵێت: ئامادەیی تەواو دەردەبڕین بۆ هەر هاوکارییەک لە پێناو سەرکەوتنی پرۆسەکە.

هەواڵ:KNNC

نێچیرڤان بارزانی، سەرۆکی هەرێمی کوردستان لەبارەی بریاری خۆهەڵوەشاندنەوە و چەکدانانی پارتی کرێکارانی کوردستان-پەکەکە راگەیەنراوێکی بڵاوکردەوە و دەڵێت: ئەو هەنگاوە نیشانەی پێگەیشتنی سیاسییە و رێگە بۆ دیالۆگێکی راستەقینە دەکاتەوە کە پێکەوەژیان و سەقامگیری لە تورکیا و سەرتاسەری ناوچەکە بەهێز دەکات.

راشیگەیاند، "ئێستا هه‌موان چاويان له‌وه‌يه‌ ئەم هەنگاوە گرنگه‌، بە هەنگاوی ديكه‌ى ئەرێنی و پێويست لەلایەن هەموو لایەنە پەیوەندیدارەکانەوە وەڵام بدرێتەوە و ‌ زەمینەیەکی دروست و گونجاو ده‌هێنێته‌ ئاراوه‌ و ده‌بێته‌ بنەمای ئاشتییەکی هەمیشەیی و گشتگیر کە کۆتایی بە دەیان ساڵ له‌ توندوتیژی و ئازار و مه‌ينه‌تى دەهێنێت و ناوچەکە بەرەو ئاسۆی نوێی پێشکەوتن دەبات".

سەرۆکی هەرێم، ستایشی رۆڵی سەرۆککۆماری تورکیا دەکات لە پشتگیریکردن و هه‌وڵه‌کانی بۆ سه‌رخستنی پرۆسه‌که‌.

جەختیشدەکاتەوە، هەرێمی کوردستان وه‌ك هه‌ميشه‌ پشتگیريی هه‌مو هەوڵێك‌ بۆ چارەسەرکردنی ناکۆکییەکان بە شێوەیەکی ئاشتیانە دەکات و هیوادارین ئەم دەستپێشخەرییە ببێتە خاڵی وەرچەرخانێکی یەکلاکەرەوە.

ئامادەیش دەردەبڕێت بۆ به‌رده‌وامی له‌ پێشکەشکردنی هه‌ر جۆرە يارمه‌تى و هاوكارييه‌ك بۆ سەرکەوتنی ئەو دەرفەتە.