لەكاتی مەشق و راهێنانی سوپای سریلانكا هێلیكۆپتەرێك كەوتە خوارەوە و هەشت قوربانی لێكەوتەوە.


هەواڵ: (KNNC)


ئاژانسی فرانس پرێس لەسەرزاری بەرپرسێكی سەربازی سریلانكاوە كە رەتی كردوەتەوە ناسنامەكەی ئاشكرا بكرێت بڵاویكردوەتەوە: لەكاتی مەشق و راهێنانی سوپای وڵاتەكەیدا، هێلیكۆپتەرێك لە جۆری بێڵ (212) بەهۆكارێكی نادیار كەوتە خوارەوە بۆ ناو دەریاچەی (مادورو ئۆیا) كە ناوچەكە (300) كیلۆمەیتر لە رۆژهەڵاتی پایتەختەوە دورە.


وتیشی: هیلیكۆپتەرەكە ژمارەیەك سەربازی تێدابوە كە لە روداوەكەدا شەش كەسیان گیانیان دەستداوە و دو كەسی دیكەیان بریندابون، بۆ لێكۆڵینەوە لە هۆكاری كەوتنە خوارەوەكەی لێكۆڵینەوەیان دەستپێكردوە.


پێشتر و لەساڵی (2020)ـدا لە روداوێكی دیكەی كەوتنە خوارەوەی فڕۆكەیەكی دو بزوێنەری هێزی ئاسمانی سریلانكا كەوت خوارەوە و چوار سەرباز گیانیان لەدەستدا، هەروەها لە ساڵی (2000)ـیشدا، كۆپتەرێكی هێزی ئاسمانی ئەو وڵاتە كەوتە خوارەوە و (15) سەرباز و سەرجەم تیمی فڕۆكەكە گیانیان لەدەستدا.