دوای ئەوەی ئەمەریکا رایگەیاند کار دەکات بۆ گەیاندنی هاوکارییەکان بۆ غەززە، وەزیری ئاسایشی ئیسرائیل داوای لە حکومەتی وڵاتەکەی کردوە دەستپێکردنەوەی هاوکارییەکان بۆ ناوچەی گەمارۆدراوی فەلەستین قبوڵنەکات و هەوڵدانەکە بە "گەمژەیی و کارێکی نا ئەخلاقی " وەسفدەکات.

هەواڵ:KNNC

وەزیری ئاسایشی ئیسرائیل،  ئیتامار بن گڤیر، کە بە وەزیرە "توندڕەوەکە" بەناوبانگە،  رایگەیاندوە؛ ئەمەی ئەمەریکا دەیکات کارێکی هەڵەیە و نا ئەخلاقیشە، بەبێ ئازادکردنی بارمتەکان نابێت ڕێگەبدرێت هیچ هاوکارییەک رەوانەی غەززە بکرێت.

ناوبراوە داوای لە لە سەرۆک وەزیران و وەزیرەکانی حکومەتەکەی کردوە، ئەو هەوڵە کارەساتبارە بۆ دەستپێکردنەوەی ناردنی هاوکارییەکان بۆ دانیشتنی غەززە رابگرن و ئەو هەڵە ستراتیژییە نەکەن، باسی لەوەشکردوە؛ "لەکاتێکدا ئیسرائیلییە ڕفێنراوەکان برسی دەکرێن، غەززەییەکان بڕێکی زۆر پێداویستی وەردەگرن".

ئەو قسانەی وەزیرەکی ئیسرائیل لە کاتێكدایە، لە غەززە بەهۆی نەبونی پێداویستی و خۆراکەوە دۆخی برسێتی ڕاگەیەندراوە و ترەمپیش لەسەر دۆخەکە ئاماژەی بەوەکردوە؛ لە هەوڵدان میکانیزمێک بدۆزنەوە تا بتوانن هاوکارییە مرۆییەکان بگەیەننە دانیشتوانی ناوچە گەمارۆدراوەکە.