بۆ بەشداری لە کۆنفرانسی گفتوگۆی نێوان ئێران و وڵاتانی عەرەبی و پێش بەڕێوەچونی گەڕی چوارەمی دانوستانەكانی نێوان واشنتۆن و تاران، وەزیری دەرەوەی ئێران سەردانی سعودیە و قەتەر دەکات.


هەواڵ: (KNNC)


ئیسماعیل بەقائی، وتەبێژی وەزارەتی دەرەوەی ئێران رایگەیاند: بەمەبەستی بەشداری لە کۆنفرانسی گفتوگۆی نێوان ئێران و وڵاتانی عەرەبی كە لە دۆحە بەڕێوە دەچێت، هەروەها پێش بەڕێوەچونی گەڕی چوارەمی دانوستانەكانی نێوان واشنتۆن و تاران، سبەینێ شەممە عەباس عیراقچی، وەزیری دەرەوەی ئێران سەردانی سعودیە و قەتەر دەکات.


ئاماژەی بۆ ئەوشكردوە، خولی چوارەمی دانوستانە ئەتۆمییەکەی نێوان ئێران و ئەمەریکا لە رۆژی یەکشەممە لە شاری مەسقەتی عوممان بەڕێوەبچێت.


میدیا جیهانییەكانی ئاماژەیان بۆ ئەوەكردوە، لە هەمان كاتی بەڕێوەچونی گەڕی چوارەمی دانوستانەكانی تاران و واشنتۆن، بڕیار وایە كە دۆناڵد ترەمپ سەرۆکی ئەمەریکا لە هەمان ماوەدا سەردانی سعودیە، قەتەر و ئیمارات بکات.


پێشتر بەرپرسێكی باڵای تاران ئاشكرایكردبو، خولی چوارەمی دانوستانەكانی ئەمەریكا و وڵاتەكەی رۆژی یەكشەممە (2025/5/11) بەڕێوەدەچێت، هاوكات ئاژانسی هەواڵی رۆیتەرز بڵاویكردەوە كە تا ئێستا رۆژەكەی دیاری نەكراوە.