تا دێت نرخی زێڕ زیاتر بەرزدەبێتەوە و ئۆنسەیەک نزیکدەبێتەوە لە 3400 دۆلار.

ئابوری:KNNC

لەگەڵ کردنەوەی بازاڕە داراییەکانی ئاسیا، نرخی زێڕ بەرزبونەوەی تۆمارکرد و ئۆنسەیەک بە 3.315 دۆلار مامەڵەی پێوەدەکرێت.

هاوکات، بەپێی داتاکانی ئاژانسی رۆیتەرز، نرخی ئایندەی زێڕی ئەمەریکا بەڕێژەی زیاتر لە  2% بەرزبوەتەوە و گەیشتوەتە 3395 دۆلار بۆ هەر ئۆنسەیەک.

نرخی زێڕ لەسەرەتای ئەمساڵەوە تا ئێستا بەرێژەی 27% بەرزبوەتەوە.

دابەزینی نرخی دۆلار بۆ نزمترین ئاستی لە ماوەی سێ ساڵدا، پەرەسەندنی گرژییە ئابورییەکانی نێوان ئەمەریکا و چین لە هۆکارە سەرەکییەکانی بەرزبونەوەی نرخی زێڕن لە جیهاندا.

سەبارەت بە کانزاکانی دیکەش، نرخی زیوی سپۆت بەڕێژەی 0.1% بەرزبوەتەوە بۆ 32.63 دۆلار بۆ هەر ئۆنسەیەک، پلاتینیۆم بەڕێژەی 0.2% بەرزبوەتەوە و گەیشتوەتە 969.20 دۆلار، پالادیۆم بەڕێژەی 0.3% دابەزیوە و گەیشتوەتە 959.20 دۆلار.