وەزارەتی دارایی و ئابوری حکومەتی هەرێم رایگەیاند، رۆژی هەینی موچەی سەرجەم فەرمانبەران و موچەخۆران دابەشدەکرێت و لە هەفتەی داهاتو راستەوخۆ دەست بە دابەشکردنی موچەی مانگی نۆ دەکرێت.

هەواڵ:KNNC

 

لە راگەیەنراوێکدا وەزارەتی دارایی و ئابوری حکومەتی هەرێم بڵاویکردوەتەوە، ماوەی سێ رۆژە شاندێکی تەکنیکی وەزارەتەکە لە بەغدادن بەمەبەستی تەواوکردنی رێکارەکانی ناردنی تەمویلی موچەی مانگی ئەیلول و چارەسەرکردنی ئاستەنگەکانی بەردەم ناردنی ئەو لێبڕینانەی لەمانگی شوبات تا مانگی ئاب راگیرابون، لەو ماوەیەدا چەندین کۆبونەوەیان لەگەڵ فەرمانگە پەیوەندیدارەکانی وەزارەتی دارایی حکومەتی فیدراڵ ئەنجامداراوە و لەسەر ئەم بابەتانە گەیشتونەتە رێککەوتن:.

 

1-دوای تەواوکردنی سەرجەم ڕێکارەکانی ناردنی تەمویلی موچەی مانگی ئەیلول، ئێوارەی ڕۆژی چوار شەممە بڕی ( 598) ملیار دینار وەک تەمویلی موچەی مانگی ئەیلولی فەرمەنبەران و خانەنشینانی شارستانی و فەرمانبەرانی گرێبەست خرایە سەر هەژماری بانکی وەزارەتی دارایی و ئابوری هەرێمی کوردستان.     

 

2- لەسەر ئەو بنەمایە بڕیاردا رۆژی هەینی ( ٢٠٢٤/١٠/٤ ) دەست بەدابەشکردنی موچەی مانگی ئاب بکرێت و لەماوەی چەند ڕۆژێکدا موچەی سەرجەم فەرمانبەران و موچەخۆران دابەش دەکرێت.

 

لە رونکردنەوەکەی وەزارەتی داراییدا هاتوە، رونکردنەوە و زانیاری پێویست لەسەر ئەو لێبڕینانەی لەمانگی شوبات تا مانگی ئاب لەلیستی موچەی فەرمانبەرانی هەرێم بەبیانوی جیاواز ڕاگیرابون، بەداتاو زانیاری دروست و نوسراوی فەرمی پێشکەش بەفەرمانگە پەیوەندیدارەکان لە وەزارەتی دارایی حکومەتی فیدراڵ کراو  بڕیارە هەفتەی داهاتوو سەرجەم ئەو لێبڕینانە خەرج بکرێت.
وەزارەتی دارایی دەشڵێت: دوای خەرجکردنی موچەی مانگی ئەیلولی فەرمانبەرانی عێراق، لە هەفتەی داهاتودا راستەوخۆ دەست بە دابەشکردنی موچەی مانگی ئەیلولی فەرمانبەرانی هەرێم دەکرێت.

1010 جار خوێندراوەتەوە