وەزیری دەرەوەی عێراق جەختی كردەوە لەپێویستی دوربونی وڵاتەكەی لەو جەنگانەی لەناوچەكە رودەدەن، ئاماژەی بەوەدا جەنگ دەبێتە هۆی دروستبونی پشێوی كە رێكخراوە تیرۆریستیەكانی وەك داعش دەیقۆزنەوە.

هەواڵ:KNNC

فوئاد حسێن، لەكۆبونەوەیەكی تایبەت بەوڵاتانی هاوپەیمانێتی نێودەوڵەتی دژی داعش لەواشنتۆن، هۆشداریدا لەوەی جەنگ یارمەتیدەر دەبێت لە خوڵقاندنی حاڵەتێكی پشێوی كە رێكخراوە تیرۆریستییەكان سودی لێ دەبینن و دەبێتە هۆی زیادبونی ژمارەی ئاوارە و پەنابەركان و زیادبونی قەیرانە مرۆییەكان.

وتیشی: حكومەتی عێراق هەست بە نیگەرانی توند دەكات لەبارەی دۆخی ئێستای رۆژهەڵاتی ناوەڕاست بەتایبەت غەززە و لوبنان.

وەزیری دەرەوەی عێراق، باسی لەگرنگی هەماهەنگی لەنێوان وڵاتانی هاوپەیمانێتی نێودەوڵەتی كرد بۆ بەرەنگاربونەوەی داعش بەهەمو شێوازەكان لەوانە تۆڕی ئینتەرنێت ، لەپێناو زامنكردنی هێنانەدی سەركەوتنی تەواوەتی بەسەر تیرۆر.