لەسەر داواى سودانى... کۆبونەوەى ئەنجومەنى پارێزگاى کەرکوک بۆ هەفتەى داهاتو دواخرا

KNN : Kurdish News Network
10:46 - 01/08/2024
کوردستان
+
-

لەگەڵ ئەوەى تەواوى ئامادەکارییەکان بۆ بەڕێوەچونى کۆبونەوەى ئەنجومەنى پارێزگاى کەرکوک تەواو ببو، بەڵام لەسەر داواى محەمەد شیاع سودانى و بۆئەوەى دەرفەت بدرێتە تەواوى لایەنەکان بۆ رێککەوتن، کۆبونەوەکە بۆ سەرەتاى هەفتەى داهاتو دواخرا.

هەواڵ:KNNC



پەیامنێرى کەى ئێن ئێن لە کەرکوک رایگەیاند؛ ئەمڕۆ تەواوى ئامادەکارییەکان بۆ ئەنجامدانى کۆبونەوەى ئەنجومەنى پارێزگاى کەرکوک کۆتایی هاتبو، بەشێک لە ئەندامە عەرەب و تورکمانەکانیش ئامادە دەبون بەشدارى بکەن تەنها پارتى دیموکراتى کوردستان بەشدارى یەکجاریی نەدەکرد.

 

ئاماژەى بۆ ئەوەکرد 9 ئەندام ئامادەیی دانیشتنەکە دەبون، ئەندامێکى عەرەبیش بێ بڕیاربو، بەڵام بە ئەگەرى زۆرەوە بەشدارى دەکرد و بەمەش بە 10 ئەندامەوە نیسابى یاسایی تەواو دەبو دەتوانرا کۆبونەوەکە بکرێت.

 


وتى:"کەمێک پێش دەستپێکردنى کۆبونەوەکە و لەسەر داواى محەمەد شیاع سودانى، سەرۆک وەزیرانى عێراق، کۆبونەوە ئەنجومەنى پارێزگا بۆ سەرەتاى هەفتەى داهاتو دواخرا بۆئەوەى دەرفەت بە هەمو لایەنەکان بدرێت بۆ بڕیاریدان و رێککەوتن.

 


پەیامنێرى کەى ئێن ئێن ئەوەشى ئاشکرا کرد کە لە کۆبونەوەکەى هەفتەى داهاتودا لە هەر ئەگەرێکدا کۆبونەوەکە ئەنجام دەدرێت و پۆستى پارێزگار یەکلایی دەکرێتەوە، ئەگەر هەمو لایەنەکان بەشداربن و ئەگەریش بایکۆتى دانیشتنەکە کرا، 10 ئەندامەکە کۆبونەوەکە بەڕێوەدەبەن و پۆستەکان یەکلایی دەکەنەوە.


کەرکوک/ ئۆژین جۆڵا

 

1002 جار خوێندراوەتەوە