وەزیری دەرەوەی ئەمەریكا رایدەگەیەنێت: بۆ رێگری كردن لە پێشڕەویەكانی روسیا و بەهێزكردنی بەرگری ئۆكرانیا ناتۆ بڕیاری داوە هاوكاری سەربازی پێشكەش بە كیێڤ بكات و لەو چوراچێوەیەشدا ژمارەیەك فڕۆكەی (F-16) رەوانەی ئەو وڵاتە  دەكرێت.


هەواڵ: (KNNC)


لە میانی کۆبونەوەی لوتکەی ناتۆ لە واشنتۆن ئەنتۆنی بلینکن، وەزیری دەرەوەی ئەمەریکا رایگەیاند: بۆ بەهێزكردنی بەرگری ئۆكرانیا دژی هێرشەكانی روسیا، وڵاتانی ناتۆ (هاوپەیمانی باکوری ئەتڵەسی) دەستیان کردوە بە ناردنی فڕۆکەی جەنگی (F-16) كە ئێستا لەلایەن دانیمارك و هۆڵەنداوە فڕۆكە بۆ ئەو وڵاتە دەنێردرێت و لەكۆتایی هاویندا فڕۆكەكان دەخرێنە خزمەتی ئەو وڵاتەوە.


پێشتر جۆ بایدن، سەرۆکی ئەمەریكا رایگەیاندبو: بۆ رێگری كردن لە پێشڕەوییە سەربازییەكانی روسیا هەریەك لە سەرۆك وەزیرانی هۆڵەندا، دانیمارک، بەلجیكا و نەرویج بەڵێنیان دابو كە یارمەتی سەربازی پێشكەش بەئۆكرانیا بكەن، لەو چوارچێوەیەشدا، هۆڵەندا و دانیكارك ئەمڕۆ چوارشەممە دەستیانکردوە بە گواستنەوەی ژمارەیەك فڕۆکەی (F-16) بۆ کیێڤ.


لای خۆشیانە بەرپرسانی سەربازی ئۆکرانیا ئاماژەیان بۆ ئەوەكردوە، ئەو فڕۆکە جەنگییان یارمەتی کیێڤ دەدەن بۆ وەڵام دانەوەی موشەکەکانی روسیا کە شارەکان بە ئامانج دەگرن، هەروەها بۆ روبەڕوبونەوەی هێزەکانی مۆسکۆ و رێگری كردن لە پێشڕەوییەكانیان.


رۆژنامەی وۆڵ ستریت جۆرناڵ ئاشكرایكردوە، بەهۆی بەردەوام شەڕی روسیا و ئۆكرانیاوە، بەردەوام ئەمەریکا و هاوپەیمانەکانی چەکی پێشکەوتویان بۆ كیێڤ دابینكردوە.


راگەیاندنی پێشكەشكردنی هاوكارییە سەربازییەكان بۆ ئۆكرانیا لەكاتێكدایە، لە دو رۆژی رابردودا سوپای روسیا گەورەترین هێرشی موشەکی بۆسەر ناوچەیەكی نیشتەجێبون و نەخۆشخانەیەكی مناڵان لە شاری كیێڤ ئەنجامدابو كەبەهۆیەوە زیاتر لە (33) گیان لەدەستدان و برینداربونی (100) كەسی دیكەی لێكەوتەوە.