ئاسایشی دهۆک رێگری لە بەشێک لە هاوڵاتییانی پارێزگای دهۆک دەکات، دژی لەشکرکێشییەکانی تورکیا خۆپیشاندان ئەنجام بدەن.

 

هەواڵ:KNNC

 

پەیامنێری کەی ئێن ئێن لە دهۆک رایگەیاند، دژی لەشکرکێشییەکانی تورکیا و شەڕ و بۆردومان لە ناوچەکانی سنوری پارێزگاکە، بەشێک لە دانیشتوانی ناحیەی دێرەلوک و گوندی کوهەرزی رێگەی سەرەکی نێوان قەزای ئامێدی – دێرەلوک- دهۆک-یان داخست.

 

وتیشی، دانیشتوانی ئەو ناوچانە داوای راگرتنی شەڕ و بۆردومان و لەشکرکێشییەکانی سەر ناوچەکانیان دەکەن و ئاماژەیان بەوەشکردوە، بەهۆی هێرش و لەشکرکێشییەکانی سوپای تورکیا چەندین گولـلە تۆپ لەناو شار و شارۆچکەکانی سنوری پارێزگای دهۆک کەوتونەتە خوارەوە بەهۆیەوە مەترسی لەسەر ماڵ و ژیانیان دروستبوە.

 

پەیامنێری کەی ئێن ئێن راشیگەیاند، دوای زیاتر لە کاتژمێرێک لە داخستنی رێگاکە لەلایەن هێزە ئەمنییەکانی ناوچەکە بەزۆر بڵاوە بە خۆپیشاندەران کراوە و رێگریش کراوە دەزگاکانی راگەیاندن روماڵی خۆپیشاندانەکە بکەن.

دهۆک؛ مەسعود هادی

142 جار خوێندراوەتەوە