بۆ ئاودانی باخچەکانی هەولێر، حکومەت پڕۆژەیەکی 300 ملیۆن دۆلاری جێبەجێ دەکات

KNN : Kurdish News Network
04:31 - 22/09/2022
کوردستان

حکومەتی هەرێمی کوردستان بە گوژمەی 300 ملیۆن دۆلار، پڕۆژەی ئاوی قورسی هەولێر جێبەجێ دەکات بۆ ئاودانی پارک و باخچەکان.

فەرمانگەی میدیا و زانیاری حکومەتی هەرێم بڵاویکردەوە، پڕۆژەی ئاوی قورسی هەولێر، بە گوژمەی 300 ملیۆن دۆلار بەدرێژیی 75 كیلۆمەتر ئاوەڕۆ، بەمەبەستی چارەسەركردنی گرفتی ئاوی قورس، جێبەجێ دەكرێت و ئەو ئاوەی كە لە ماڵان بەفیڕۆدەچێت، جارێكی دیكە خاوێندەكرێتەوە و بەكاردەهێندرێتەوە بۆ پارک و باخچەكان.

بەڕێوەبەری گشتی ئاو و ئاوەڕۆ لە وەزارەتی شارەوانی و گەشتوگوزار، لەبارەی ئەم پرۆژەیەوە رایگەیاندوە: پڕۆژەكە بە سێ قۆناغ تەواو دەکرێت، پارە بۆ قۆناغی یەکەم دابینکراوە، کە درێژییەکەی 75 کیلۆمەترە.

لەلایەکی دیکەوە بە مەبەستی چارەسەركردنی کێشەی پیسبوونی ئاو لە شاری سلێمانی وەزارەتی شارەوانی و گەشتوگوزار بڕی 308 ملیۆن و 277 هەزار و 661 یەك دینار بۆ بەڕێوەبەرایەتیی ئاوی سلێمانی خەرج دەكات لەسەر ڕێژەی ١٥٪ی داهاتی ئاو لە سنووری بەڕێوەبەرایەتیی ئاوی سلێمانی بە مەبەستی جێبەجێكردنی پرۆژەی ڕاكێشانی بۆڕی لە شەقامی بۆتان بۆ چارەسەركردنی گرفتی پیسبوونی ئاو.

110 جار خوێندراوەتەوە