لە ئەمساڵدا نزیکەی (10) شەپۆلی خۆڵبارین رویان لە عێراق کردوە و زۆربەی جارەکان گەشتی فرۆکەکانی دواخستوە و هەزاران کەس رەوانەی نەخۆشخانەکان کراون بە هۆی توشبون بە تەنگەنەفەسی و پیسبونی هەواوە. 

هۆکاری سەرەکی خۆڵبارین تا ئێستا لەلایەن زانایانەوە نەزانراوە، بەڵام بەشێك لە شارەزایان پێیان وایە پەیوەندییەکی بەهێز لەنێوان خۆڵبارین و نەمانی سەوزایی و وشکبونەوەی زەوی هەیە ئەمەش وایکردوە گەردەلولەکان بەم دواییانە زیاتر بن.

بەنەفشە کەینوش لە پەیمانگای رۆژهەڵاتی ناوەڕاست رایگەیاند: گەردەلولی خۆڵبارین و خۆڵبارین لەو وڵاتانەدا سەرهەڵدەدەن کە سەوزاییان کەمە و ئاماژەی بەوەشداوە، بونی سەوزایی و دارستان رێگر دەبێت لە گەردەلول و رەشەبای بەهێز.

هاوکات، ئینریك تێرادیلاس، شارەزای کەشناسی و ئەندامی رێکخراوی کەشوهەوای جیهانی رایگەیاند: زۆری خۆڵبارین پەیوەندی هەیە بە کەمبونەوەی ئاوی روبارەکان لە عێراق و بەرنەدانەوەی لە لایەن ئێران و تورکیاوە کە چەند بەنداوێکیان لەسەر ئەو ئاوانە دروست کردوە کە بەرەو عێراق دێن.

دەشڵێت: وشکبونی روبار و دەریاچەکانی عێراق و ئێران زەوییەکان وشک دەکەن و توێژاڵی سەرەوە قڵیش دەبات و لەکاتی تێپەڕبونی ڕەشەبا بەشێك لەو خۆڵە لەگەڵ خۆی دەبات و رێژەی خۆڵەکە لەگەڵ رەشەبایەکە زیاد دەکات و تەپ و تۆز بەرزدەبێتەوە.

بەهۆی گەردەلولەکانی خۆڵبارینەوە شازادە محەمەد بن سەلمانی سعودیە رایگەیاند: ساڵانە نزیکەی (13) بلیۆن دۆلار زیان دەکەین و بڕیارمان داوە بۆ روبەروبونەوەی ئەو دیاردیە (50) ملیۆن نەمام و دار بڕوێنین و گەورەترین پڕۆژەی بە دارستان کردن لە جیهاندا دروست بکەین.