تەندروستى کەرکوک یەکەم حاڵەتى توشبونى بە تاى خوێنبەربون لە شارەکە راگەیاند و ئاشکراشى دەکات "توشبوەکە گۆشتفرۆشە و کەرەنتین کراوە".

دکتۆر. سەباح نامیق بەڕێوبەری بەشی تەندروستی گشتی لەفەرمانگەی گشتی تەندروستی کەرکوک بە (KNN)ی راگەیاند ، ئەمڕۆ یەکشەممە، حاڵەتێکی ڤایرۆسی تای خوێن بەربوون تۆمارکرا کە پیاوێکى تەمەن (47) ساڵە و خەڵکی گەڕەکی باردخانەی شاری کەرکوکە و لەئێستادا دۆخی تەندروستی جێگێرە.

پێشتر تەندروستی کەرکوك رایگەیاندبو: بەهۆی بڵاوبونەوەی ڤایرۆسی تای خوێن بەربون لە نۆ پارێزگای عێراق چەند ئامادەکاریەکمان کردووە کە یەکێک لەوانە تەرخان کردنی نەخۆشخانەی (شیفای14) کە لە پێشووتردا تایبەت بوو بە چارەسکردنی توشبووانی ڤایرۆسی کۆرۆنا و ئێستا کراوەتە نەخۆشخانەیەک بۆ چارەسەکردنی توشبووانی تای خوێن بەربون.

پەتای کۆنگۆ یاخود تای خوێنبەربون، بەهۆی ڤایرۆسێکەوە سەرهەڵدەدات کە زیندەوەرێکی بچوک "گەنە" هەڵیدەگرێت و نەخۆشییەکە لە ڕێگەى ئاژەڵەوە بۆ مرۆڤ دەگوازرێتەوە، بۆ یەکەمجار لە ساڵی 1944 لە جەنگى جیهانی دووەمدا سەریهەڵداوە، رێژەى (40%)ى ئەو کەسانەى توشى دەبن پێى دەمرن و ماوەیەکیشە چەند حاڵەتێک لە پارێزگاکانى باشور و ناوەڕاستى تۆمارکراوە.

نیشانەکانی بریتین لە تا، ئازاری ماسولکە، سەر ئێشە، ڕشانەوە، سکچون و خوێناوی بوونی پێست، نیشانەکان لە ماوەی دو ھەفتەدا دەردەکەون و ئەوانەی کە ڕزگاریان دەبێت دو ھەفتە پاش توش بون چاکدەبنەوە.