لەدوایین راپۆرتی خۆیدا کۆمپانیای دیلۆیت راپۆرتی پەیوەست بە دۆسێی نەوتی لە ساڵی (2021)ی بڵاوکردەوە، راپۆرتەکە چەندین داتا و زانیاری تێدا بون کە لەگەڵ ئەو زانیاریانەدا دژیەکبون کە بەرپرسانی حکومەتی هەرێم ئاماژەیان پێکردبو.

 

 

لە راپۆرتەکەی دیلۆیتدا دەردەکەوێت کە لە کۆی داهاتی نەوت (%44)ی  بۆ حکومەتی هەرێم ماوەتەوە، ئەمە لەکاتێکدایە کە سەرۆکی حکومەتی هەرێم ماوەیەک پێش ئێستا رایگەیاند کە لە پارەی نەوت تەنها (41%)ی بۆ حکومەت دەمێنێتەوە ،جیاوازی نێوان ئەم دو رێژەیەش سێ پۆینتە کە دەکاتە سەدان ملیۆن دۆلاری ساڵانە.

 

 

 بەگوێرەی راپۆرتەکە ئەو پارەیەی لە هەر بەرمیلێک نەوتی هەناردەکراو دەمێنێتەوە، بریتییە لە رێژەی (%44) کۆی داهاتەکەی، ئەمە لەکاتێکدایە کە لە راپۆرتەکانی پێشودا ئەو بڕە زیاتربوە و هەندێک جار گەیشتوەتە سەرو (47%)ی کۆی داهاتەکە، ئەمەش لەکاتێکدایە کە سەرۆکی حکومەتی هەرێم پێشتر رایگەیاندبو کە لەم کابینەیەدا توانیانە بە گرێبەستەکاندا بچنەوە و بەشێک لەو داهاتەی کە پێشتر بەهەدەردەچو بگەڕێننەوە بۆ حکومەتی هەرێم.

 

 

لە دوایین راپۆرتی دیلۆیتدا، ئاماژە بە هەندێک خەرجی کراوە کە رون نییە مەبەست لێیان چییە و هیچ وردەکارییەک لەبارەیەوە بڵاونەکراوەتەوە، بۆ نمونە لە بەشێکی راپۆرتەکەدا ئاماژە بە بڕی ئەو پارەیە کراوە کە حکومەت وەکو رسومات و گواستنەوە و زیانی ئاڵوگۆڕی دراو داویەتی، کە بریتیبوە لە (651) ملیۆن و (527) هەزار و (462) دۆلار بوە، بەڵام لە بڕگەیەکی دواتردا دوبارە ئاماژە بە پارەی رسوماتی دیکە کراوەتەوە و کە بریتیە لە (80) ملیۆن و (645) هەزار و (316) دۆلار، بەبێ ئەوەی ئاماژە بە وردەکارییەکەی بکرێت و بزانرێت کە بە کێ دراوە.

 

 

سەرنجڕاکێشترین بەشی ناو راپۆرتەکەی دیلۆیت ئەوەیە، کە ئاماژەی بەوەکردوە لە ماوەی ساڵی (2021)دا حکومەتی هەرێم هەشت ملیۆن و (971) هەزار و (207) دۆلاری داوە بە پارێزەر و راوێژکارانی یاسایی، بەڵام هیچ ئاماژەیەکی بەوەنەکردوە، ئەو پارێزەرانە لە کام دۆسیانەدا کاریان کردوە و ئەنجامەکەیان چی بوە؟

 

 

هەمو ئەم زانیارییە دژەیەک و ناڕونانە، ئەوە دەردەخەن کە نە حکومەتی هەرێم و نە کۆمپانیای دیلۆیت نەیانتوانیوە زانیاری و داتای ورد و بێخەوش بڵاوبکەنەوە، بەڵکو بڵاوکردنەوەی راپۆرتەکان تەنها وەکو ئامرازێکە بۆ وەڵامدانەوەی ئەو ڕەخنانەی کە ئاراستەی حکومەتی هەرێم دەکرێن.

295 جار خوێندراوەتەوە