حکومەتی هەرێم رایدەگەیەنێت، لەم ماوەیەدا پێدانی کاتژمێرەکانی کارەبای نیشتیمانی بە هاوڵاتیان کەمبووەتەوە بۆ (16 کاتژمێر و 20) خولەک، ئەوەش بەهۆی چەند کێشەیەکەوە لە وێستەگەکانی کارەبا.

لە رونکردنەوەیەکی فەرمانگەی میدیا و زانیاری حکومەتی هەرێمدا هاتووە، یەکێک لە هۆکارەکانی کەمبوونەوەی کارەبا بۆ وێستگە (300) مێگاواتییەکەى خەبات دەگەڕێتەوە کە لە ژێر چاککردنەوە دایە و بڕیارە لە ڕۆژی (5-12-2021)ى ئەمساڵ بکەوێتەوە کار.

ئاماژەی بەوەشکردووە، کارەباى هاوردەکراوى پارێزگای دهۆکیش کە (150) مێگاواتە و لە وڵاتی تورکیاوە دەکڕدرێت، لە لەلایەن تورکیاوە ڕاگیراوە و حکومەتی هەرێمی کوردستان لە هەوڵی چارەسەرکردنیدایە.

لە رونکردنەوەکەدا هاتووە، وێستگەی بەرهەمهێنانی کارەبای ئەگریکۆی گەرمیان، یەکێکی دیکەیە لە وێستگەکانی بەرهەمهێنانی کارەبای نیشتمانی و بڕیار وایە لەگەڵ زیادکردنی بەرهەمی گاز بۆ ئەو وێستگەیە بڕی پێدانی کارەباکەى لە (165) مێگاواتەوە بگاتە (200) مێگاوات و بڕیارە لە (28-11-2021) بکەوێتە کار.