دواى هەوڵى تیرۆرکردنى، داهاتوى کازمى بەرەو کوێ دەڕوات؟

KNN : Kurdish News Network
09:58 - 16/11/2021
ڕاپۆرت

چاودێرانی دۆخی سیاسی عێراق پێیان وایە، دوای هەوڵە شكستخواردووەكەی تیرۆركردنی مستەفا كازمی سەرۆكوەزیران، دۆخەكە پێچەوانەی ئەوە هەڵگەڕاوەتەوە كە جێبەجێكارانی پلانیان بۆ دانابوو، بەجۆرێك كازمی لەڕووی سیاسی و جەماوەرییەوە بەهێزتركردووە، لەسەر ئاستی عەرەبی و نێودەوڵەتیش پشتیوانی زیاتری بۆ پەیدابووە، ئەوانەش هەلى دووبارە پێكهێنانەوەی كابینەی حكومەتی زیاتر كردووە.

دوای راگەیاندنی ئەنجامی هەڵبژاردن، رێكەوتن لەسەر كەسێكی  قبوڵكراو لەلایەن زۆرینەوە بۆ پێكهێنانی حكومەت كارێكی زۆر قورسە، ئەوەش بەهۆی دۆخی عێراق و ئەو دابەشبوونەی لایەنەكانی تێدان، هاوكات تۆمەتباركردنی یەكتر و وەستانەوە بەڕوی یەكدا، كە هەموو ئەوانە كاری ناونانی كەسێك بۆ پێكهێنانی حكومەت سەخت دەكات.

دواكەوتن بۆ ماوەی چەند مانگێك لە دیاریكردنی سێ كەسایەتی بۆ پۆستە باڵاكانی سەرۆككۆمار، سەرۆكوەزیران، سەرۆكی ئەنجومەنی نوێنەران، بەشێوەیەكی خراپ كاریگەری لەسەر دۆخی ئەمنی و سیاسی وڵات دەبێت.

رەعد هاشم توێژەری سیاسی رایدەگەیەنێت، "ئەو لایەنەی سەرۆكی حكومەت دیاریدەكات، دەبێت لەڕووی مەبدەئیەوە براوەی هەڵبژاردن بێت، بەڵام لە راستیدا چەند كەسێكی دیكە هەن یاری بەمە دەكەن و دەستیان لە دیاریكردنی سەرۆكوەزیراندا هەیە، وەك چۆن پێشتریش رویداوە، ئەوانیش مەرجەعیەت، واشنتۆن، تارانن".

ئەمەریكا پێش هەوڵی تیرۆركردنەکەشى، ئارەزووی دەكرد کازمى دووبارە بۆ ئەو پۆستە كاندید بكرێتەوە، بەڵام ئێران هیچ بە پەرۆش نییە بۆ ئەو هەنگاوە، چونكە سیاسەتی كازمی كە زیاتر بەڕووی وڵاتانی عەرەبیدا كراوەیە، هەروەها وەستانەوەی بەڕووی میلیشیاكاندا. ئەوەش " تارانی بێزار كردووە" رەعد هاشم وادەڵێت.

لەبارەی مەرجەعیەتەوە ئەو توێژەرە ئاشكرای كردوە، هەرچەندە هیچ شتێكی لەوبارەیەوە نەوتووە، بەڵام پێشبینی ناكرێت دژی دووبارە كاندیدكردبونەوەی كازمی بێت، بەڵام بە چەند مەرجێكی دیاریكراو كە خۆی بە گونجاوی دەزانێت، حزبە سیاسییەكانیش لایەنی جێبەجێكارن، بەڵام زیاتر بەستراونەتەوە بەڕای ئەو سێ لایەنە سەرەكییەی پێشتر باسكران، هەر حزبە و بەپێی دوور و نزیكی لە لایەنە سەرەكیەكە هەڵوێستی دەبێت.

عەلی بیدەر نوسەری سیاسی جەخت دەكاتەوە لەسەر ئەوەی "هەوڵی تیرۆركردنی كازمی، كێرڤی جەماوەرییەكەی زۆر بەرزكردەوە،ڕووی راستەقینەی میلیشیا چەكدارەکانیشى دەرخست كە گروپێكی دەرەوەی یاسا و دژی دیموكراسین".

"هەوڵە شكستخواردووەكە بەشێوەیەكی ئەرێنى دەشكێتەوە بەسەر بەهێزكردنی دامەزراوەكانی دەوڵەت، ئەزمونی دیموكراسی لە عێراق، كازمی لە رووی جەماوەری و سیاسی لەسەر ئاستی عەرەبی و نێودەوڵەتی پشتیوانییەكی زۆر دەكرێت، ئەوەش لە بەرژوەندیدایە  بۆ ئەوە جارێكی دیكە ببێتەوە سەرۆكوەزیرانی داهاتووی عێراق"، بیدەر بەو شێوەیە باس لە دەرفەتە بەهێزەكەی كازمی دەكات بۆ دووبارە بونەوە بە سەرۆكی حكومەت.

ئەو نوسەرە سیاسییە پێیوایە كازمی ئێستا پێگەیەكی بەهێزی هەیە، ئەوەش بەهۆی ڕوبەڕوبونەوەی ئاڵەنگارییەكانی عێراق، بەتایبەت لە دۆسیەی میلیشیاكاندا، كە بونەتە دەوڵەتێك لەناو دەوڵەتدا، توانیویانە راستەوخۆ ترۆپكی دەسەڵاتی جێبەجێكردن و سەربازی بپێكن، كە ئەوەش گەشەسەندێكی زۆر مەترسیدارە.

517 جار خوێندراوەتەوە