چاودێرێکى سیاسى پێى وایە، بزوتنەوەى گۆران هەم لە دروستبونیدا مۆدێلێکى نوێ بوو، هەم لە هەنگاوى دەستلەکارکێشانەوەى رێکخەر و خانەى راپەڕاندندا مۆدێلێکى نوێى پیشاندا، دەشڵێت: دەنگدەرەکانى گۆڕان یاخین و ماونەتەوە و دەبێت وەڵامیان بدرێتەوە.

د. جەعفەر عەلى، نوسەر و چاودێرى سیاسى لەمیانى بەشداریکردنى لە بەرنامەى ستۆدیۆ رادیۆى دەنگى گۆڕان رایگەیاند: هەڵبژاردنەکەى ئەمجارە و بایکۆت، وەڵامى ئەداى کارى سیاسى حزبە سیاسییەکانى دایەوە کە ئەوەش وەڵامێکى نوێ و پڕ پەیام بوو.

رونیکردەوە، بزوتنەوەى گۆڕان نەیتوانى لە دەنگدەرەکانى تێبگات بۆیە سزادرا، چونکە ئەوەى بزوتنەوەى گۆڕان هەیبوە دەنگدەر بووە، هیچ پابەندبونێکى بەرژەوەندیخوازانەش لە نێوان دەنگدەر و بزوتنەوەکە نەبووە، ئەوەش پێچەوانەى حزبەکانى ترە کە چەندین بەرژەوەندى دەنگدەر و حزب بەیەکەوە دەبەستێتەوە، بۆیە راگرتنى ئەو جۆرە دەنگدەرە قورسە و سەرکردایەتى سیاسى گۆڕانیش چاوەڕێى ئەو وەڵامە نەبوون لە دەنگدەرەکانیان.

هەروەک پێى وایە، هەم سزادانى بزوتنەوەکە لەلایەن دەنگدەرانیەوە مۆدێلێکى نوێیە لە مێژوى سیاسى کوردا، هەم دەستلەکارکێشانەوەى خانەى راپەڕاندن و رێکخەرى گشتى.

د. جەعفەر عەلى وتیشى: هۆکارى سەرەکى شکستى گۆڕان لە هەڵبژاردن ناوخۆى گۆڕان بووە، بەدەر لەوەش هۆکارى دەرەکى بونى هەبووە، چونکە چەندە هۆکارى ناوخۆیى رۆڵ دەبینێت زیاتر لەوە هۆکارى دەرەکى بونى هەیە.

دەشڵێت: لە ئەستۆگرتنى شکستەکە و دەستلەکارکێشانەوەى خانە و رێکخەرى گشتى مۆدێلێکى نوێیە و لە هیچ بڕگەیەکى ناو جوڵانەوەى سیاسیى ئێمەدا چ لە شاخ و چ لە شار لەبەرامبەر شکست و دۆڕاندنى خاک، سەرکردایەتى حزبەکان ئامادەى دەستلەکارکێشانەوە نەبوون، بۆیە ئەم هەڵوێستە و دەستلەکارکێشانەوەى سەرکردایەتى گۆڕان بەشێکى گرنگە لە ئەخلاقى سیاسى و کارێکى باشیان کردووە و جێگاى دەستخۆشیە.

باسى لەوەشکرد، ئێستا بزوتنەوەى گۆڕان لە کەوتنێکى ترسناکدایە و دەبێت مامەڵەیەکى ژیرانەى لەگەڵ بکرێت، هەستانەوەش بەوە ناکرێت تەنها ئەو ستافە دەستى لەکارکێشاوەتەوە، خەڵکى دیکەش هەیە لە دەوروبەرى ئەوان و لە حکومەت و پەرلەمان دەبێت ئەو بەرپرسیارێتییە هەڵبگرێت، لەسەروى هەمویانەوە جڤاتى نیشتمانی، ناکرێت جارێکى دیکە دابنیشێتەوە و رێوشوێنى هەستانەوە بگرێتەبەر.

لەبارەى هەنگاوەکانى هەڵسانەوەى بزوتنەوەکە و ئاشتکردنەوەى دەنگدەرانى، د. جەعفەر پێى وایە، دەنگدەرى بزوتنەوەى گۆڕان ماوەتەوە و نەچووە بە هیچ لایەکدا و دەنگدەرێکى یاخیە و دەبێت تێبگەى ئەو دەنگدەرە دەستەمۆ ناکرێت، بۆیە هەنگاوى یەکەم تێگەشتنە لەو دەنگدەرە و وەڵامدانەوەیەتى. دواتریش دەبێت ستافێک بۆ بەڕێوەچونى کارەکانى گۆڕان دابنرێت و شەش مانگ دەرفەتى بدەیت چاودێرى بکەیت و بزانیت توانیویەتى دەنگدەران ئاشت بکاتەوە و بزوتنەوەکە سەرڕێبخاتەوە، بۆیە ئەگەر ئەوان سەرکەوتوبون دەبێت پشتیوانى بکرێن.

ئاماژەى بەوەشکرد، بەدەر لەو خاڵانەى سەرەوە، هەنگاوى هەڵسانەوەى گۆڕان مەرج نیە تەنها لە ناو بزوتنەوەى گۆڕاندابێت، بەڵکو دەبێت بۆ چارەسەرکردن و هەڵسانەوەى گۆڕان راوێژ بە خەڵکى دەرەوەى گۆڕان بکرێت و بۆچونەکانیان وەربگریت و بەشداریان پێبکرێت و رۆڵیان پێبدرێت.