کەرکوک، سوپای عێراق چەند حەشارگەیەکی داعشی بۆردمان کرد

KNN : Kurdish News Network
09:40 - 23/09/2021
عێراق

هێزی ئاسمانی عێراق چەند حەشارگەیەکی چەکدارانی داعشی لە سنوری پارێزگای کەرکوک بۆردومان کرد.

لە راگەیەنراوێکدا، شانەی راگەیاندنی ئەمنی عێراق رایگەیاند، فڕۆکەکانی (ئێف 16) و (سۆخۆی25)ی هێزی ئاسمانی عێراق، چەند حەشارگەیەکی تیرۆرستانی داعشییان لە ناوچەی وادی شای لە سنوری قەزای داقوق لە پارێزگای کەرکوک بۆردومان کردوە.

ئاماژەی بۆ ئەوەشکردوە، دوای بۆردومانەکە هێزە ئەمنییەکانی عێراق چونەتە شوێنەکە کە تونێلێکی بۆ خۆحەشاردان لێبوە و دەستیشیان بەسەر دو پشتێنەی بۆمبڕێژکراو و دو مۆبایل و چەند کەرەستەیەکی دیکەدا گرتوە، پاشان تونێلەکە و پشتێنەکان لەلایەن تیمە ئەندازەییەکانەوە لەناوبراون و تێکشکێندراون.

لەلایەکی دیکەوە شانەی راگەیاندنی ئەمنی عێراق، لە راگەیەنراوێکی دیکەدا ئاشکرایکرد لە ناوچەیەکی نزیک گوندی خازر، سێ کەسی سەربە داعش دەستگیرکراون، کە زانیارییان لەسەر سوپا و هێزە ئەمنییەکان کۆکردوەتەوە.

ماوەیەکە تیرۆرستانی داعش لە هەندێک ناوچەی عێراق و ناوچە دابڕێنراوەکان چالاکبونەتەوە و ناوبەناو هێرش دەکەن.

186 جار خوێندراوەتەوە