ئەنجومەنى وەزیران: پێویستە بانگەشەى هەڵبژاردن ئارام و دور لە توندوتیژى بەڕێوەبچێت

KNN : Kurdish News Network
06:45 - 15/09/2021
کوردستان

لە کۆبونەوەی ئەمڕۆیدا ئەنجومەنى وەزیران، هەنگاوەکانی جێبەجێکردنی چەند بڕیارێکی ئەنجومەنی وەزیران خرایەڕوو کە تایبەت بوون بە قەدەغەکردنی سیمکارتی بێ بەرایی و ئەنجامی لێکۆڵینەوە لە کوالیتی ئاردی هاوردەکراو و چەند بابەتیکى دیکە.

ئەمڕۆ چوارشەممە، ئەنجومەنى وەزیرانى هەرێمى کوردستان کۆبونەوەى هەفتانەى خۆى ئەنجامدا و بەپێى راگەیەنراوێک لە کۆبونەوەکەدا، سەرۆک وەزیران باسى لە ئامادەکارییەکانى هەڵبژاردنى ئەنجومەنى نوێنەران کردووە و باس لەوەکراوە کە پێویستە هەڵمەتی بانگەشەی هەڵبژاردن، بە شێوەیەکی ئارام و مەدەنیانە و دور لە ناوزڕاندن و یەکترشکاندن بەڕێوەبچێت.

هەر لە کۆبونەوەکەدا، هەنگاوەکانی جێبەجێکردنی چەند بڕیارێکی ئەنجومەنی وەزیران خراوەتەڕو کە تایبەت بوون بە قەدەغەکردنی سیمکارتی بێ بەرایی و ئەنجامی لێکۆڵینەوە لە کوالیتی ئاردی هاوردەکردەکراو لە دەرەوەی هەرێمی کوردستان لە روی خۆراکی و تەندروستییەوە.

بەپێى راگەیەنراوەکە، بڕگەیەکی دیکەی کۆبوونەوەکە، تایبەت بوو بە بڕیاردان لە سەر رەشنووسی ( پلانی نیشتمانیی هەرێمی بۆ مافەکانی مرۆڤ 2021 - 2025 ) کە لە کۆبوونەوەی پێشووی ئەنجومەن خرایەڕو، لە کۆبونەوەکەدا بە کۆی دەنگی ئەنجومەنی وەزیران پەسەند کرا و وەزارەت و لایەنە پەیوەندیدارەکان راسپێردران بۆ جێبەجێکردنی پلانەکە و ئاگادارکردنەوەی ئەنجومەنی وەزیران لە بەرەوپێشچوونی جێبەجێکردنی پلانەکە بە ئاراستەی برەودان بە مافەکانی مرۆڤ لە هەرێم.

لە کۆتایی کۆبوونەوەکەشدا، دانا عەبدولکەریم وەزیری ئاوەدانکردنەوە و نیشتەجێکردن، رەشنووسی ( پەیڕەوی سندووقی پاڵپشتیی گەشەپێدان رێگاوبان لە هەرێمی کوردستان )ی خستەڕو کە ئەم رەشنووسە لە لایەن وەزارەتی ئاوەدانکردنەوە و نیشتەجێکردن بە هەماهەنگیی وەزارەتە پەیوەندیدارەکان ئامادەکراو. ئەوەش بەمەبەستى پاڵپشتیکردن لە پڕۆژەکانی رێگاوبان و دانانی پێوەر بۆ بەرجەستەکردنی دادپەروەریی لە دابەشکردنی پڕۆژەکانی ئاوەدانکردنەوە و رێگاوبان لەسەر پارێزگا و ئیدارە سەربەخۆکان بە پێی شایستەبوون.

204 جار خوێندراوەتەوە