سلێمانى؛ دوو تۆمەتبار دواى بریندارکردنى پۆلیسێک دەستگیرکران

KNN : Kurdish News Network
02:19 - 14/09/2021
کوردستان

پۆلیسى سلێمانى دەستگیرکردنى دوو تۆمەتبارى راگەیاند کە پێشتر بە زەبرى چەک پارەیان لە چەند هاوڵاتیەک سەندوە و پۆلیسێکیشیان بریندار کردوە.

پۆلیسى سلێمانى لە راگەیەنراوێکدا بڵاویکردەوە، پاش ئه‌وه‌ی‌ له‌گه‌ڕه‌كی‌ سه‌رچناری‌ شاری‌ سلێمانی‌ دوو تۆمه‌تبار ڕێگرییان له‌هاوڵاتییه‌ك  کردوە ‌و له‌ژێر زه‌بری‌ چه‌كدا بڕێك پاره‌یان لێ سەندوە دواتر به‌چه‌ك برینداریان کرد، مه‌فره‌زه‌كانی‌ به‌شی‌ پۆلیسی‌ فریاكه‌وتن گەیشتنە‌ شوێنی‌ ڕووداوه‌كه‌ به‌مه‌به‌ستی‌ ده‌ستگیركردنیان، به‌ڵام تۆمه‌تباره‌كان ته‌قه‌ له‌مه‌فره‌زه‌كه‌ی‌ پۆلیس کرد و پۆلیسێكیان بریندار کرد.

بەپێى راگەیەنراوەکەى پۆلیسى سلێمانى، دواى ئەو رووداوە بنكه‌ی‌ پۆلیسی‌ سه‌رچنار لێكۆڵینه‌وه‌ و به‌دواداچونی‌ وردی‌ ده‌ستپێكردو پاش وه‌رگرتنی‌ بڕیاری‌  دادوه‌ر، توانرا هه‌ردوو تۆمه‌تبارەکە دەستگیربکرێن و ده‌ستیش به‌سه‌ر ‌ ده‌مانچەیەکدا‌ گیرا كه‌ به‌تۆمه‌تباره‌كان بووه‌.

پۆلیسى سلێمانى ئاشکراشیکردوە، له‌كاتی‌ لێكۆڵینه‌وه‌دا تۆمه‌تباره‌كان دانیان به‌تاوانه‌كه‌یاندا نا، هه‌روه‌ها دانیان به‌وه‌دا نا كه‌ پێشتریش ڕێگرییان له ‌هاوڵاتیەک‌  كردوه‌ و به‌زه‌بری‌ چه‌ك بڕێك پاره‌ و مۆبایله‌كه‌یان لێ سه‌ندووه‌، هاوڵاتیەکى دیکەشیان به‌چه‌قۆ بریندار كردووه‌.

374 جار خوێندراوەتەوە