فراکسیۆنی گۆڕان لە پەرلەمانی کوردستان راگەیەنراوێکی بڵاوکردەوە و جەختدەکاتەوە، پێویستە حکومەت نەخشەیەکی هەبێت بۆ کۆتاییهان و قەرەبوکردنەوەی لێبڕین و پێدانەوەی پاشەکەوتی موچەی موچەخۆران.


لە راگەیەنراوەکەی فراکسیۆنی گۆڕاندا هاتووە، ناردنی شایستە داراییەکانی هەرێم مافێکی دەستوری خەڵكی کوردستان  بەرهەمی کاری هاوبەشی تیمی حکومەتە، هیوادارین حکومەت و دیوانی چاودێری دارایی حکومەتی هەرێمی کوردستان داتا و زانیاری و وردەکارییەکانی داهاتە نانەوتییەکان لەگەڵ دیوانی چاودێڕی دارایی عێراق بە خێرایی وردبینی بکات و ئەرکی خۆی بۆ بەدەستهێنانی شایستە داراییەکان جێبەجێبکات.

دەقی راگەیەنراوی فراکسیۆنی گۆڕان لە پەرلەمانی کوردستان:


راگەیەنراوی فراكسیۆنی گۆڕان لە پەرلەمانی كوردستان

پاش بگرەو بەردەیەكی زۆر، دواجار ئەنجومەنی وەزیرانی عێراق بریاری دا دوای جێبەجێكردنی رێكارەكانی ناو بڕگە و ماددەكانی یاسای  بودجەی ساڵی (2020)ی عێراق، شایستە داراییەكانی هەرێمی كوردستان بنێێرێت.

ناردنی شایستە داراییەكانی هەرێم مافێكی دەستوری خەڵكی هەرێمی كوردستانە بەرهەمی كاری هاوبەشی تیمی حكومەتە.

هیوادارین حكومەت و دیوانی چاودێری دارایی هەرێمی كوردستان داتاو زانیاری و وردەكاریەكانی داهاتە نانەوتییەكان لەگەڵ دیوانی چاودێری دارایی عێراق بە خێرایی وردبینی بكات وئەركەكانی خۆی لە بەرامبەردا بۆ بەدەستهێنانی شایستە داراییەكان جێبەجێ بکات.

- ئەم هەنگاوە هاندەر بێت بۆ چاكسازی گشتی كە لە بەرنامەی كابینەی نۆیەمی حكومەتی هەرێمی كوردستان دیاریكراوە.

- دەبێت حكومەت نەخشەیەكی هەبێت بۆ كۆتایی پێهنان و قەرەبوكردنەوەی لێبڕین و پێدانەوەی پاشەكەوتی موچە بە موچە خۆران.

- جەخت دەكەینەوە لە ڕوانگەی نیشتیمانیمان بۆ سەرجەم كێشەكانی هەرێمی كوردستان  و چارەسەركردنیان و بە دەستهێنانی دەستەكەوتەكان.

- پێداگری دەكەین لە شایستە داراییەكان و پاراستنی خاكی هەرێمی كوردستان و  هاوبەشی راستەقینە بۆ مافە دەستوریەكانی خەڵكی كوردستان لەگەڵ حكومەتی عێراق.


  فراكسیۆنی گۆڕان

2021/6/16