حەوت ئامۆژگاری گرنگ بۆ یەكەم پارشێو، بیرت نەچێت جێبەجێیان بكە

KNN : Kurdish News Network
10:24 - 12/04/2021
تەندروستی

چەند كاتژمێرێكی دیكە موسڵمان دەستدەن بە ئامادەكردنی ژەمی بەرەبانگ، بە درێژی مانگی ڕەمەزان كاتژمێرێك پێش بانگی بەیانی ژەمێك نان دەخۆن و تا بانگی ئێوارە هیچ جۆرە خواردن و خواردنەوەیەكی دیكە ناچێتە گەدەیانەوە.

 

پسپۆڕانی تەندروستی جەخت لەسەر گرنگی خۆراكەكانی ژەمی پارشێو دەكەنەوە، زانایانی ئاینیش بە گرنگی دەزانن موسڵمانان پێش دەستپێكردنی ڕۆژوەكەیان ئەو ژەمەبخۆن.

 

بۆ ئەوەی ژەمی پارشێو تەندروست بێت و زیانی بۆ كەسەكە نەبێت، پسپۆڕەكان چەند ئامۆژگاری و ڕێنماییەكی گرنگیان خستوەتەڕوو كە باشترە لە یەكەم پارشێودا جێبەجێ بكرێن، ئەوانیش بریتین لە:

 

1- بوونی خۆراكی پڕ پرۆتین لەسەر خوانی یەكەم پارشێو بە تایبەت هێلكە چونكە هەستی تێربوون دەبەخشێت.

 

2- خواردنی ماست و هەنگوین و شیر سودێكی زۆری هەیە و هەستی برسێتی لە كاتی بەڕۆژووبوندا كەمدەكاتەوە.

 

3- دووركەوتنەوە لە خواردنە سورەوەكراوەكان بەتایبەت پەتاتە، پاقلە، هەروەها خواردنی ترش و تون چونكە سەرجەمیان هەستی تینوێتی زیاد دەكەن.

 

4 - نەخواردنی خۆراكە دەستكردە پیشەسازییەكان وەك باستورمە و سەلامی و پەپەرۆنی، هەروەها بەكارنەهێنانی بەهارات بۆ ئەو خواردنانەی لە پارشێودا ئامادە دەكرێن.

 

5 -بۆ ڕێگریكردن لە زیادبونی كێشی لەش لە ڕەمەزاندا،خواردنی سەوزە و میوەكان زۆر گرنگە چونكە بڕی پێویستی ڤیتامین و ماددە خۆراكییە گرنگەكان بۆ لەش دابین دەكەن، بەتایبەت خەیار و تەماتە، بیبەر، گێزەر.

 

6 -خواردنی مۆز و خورما و قەیسی وشك سودێكی زۆر هەیە، چونكە دەوڵەمەندن بە پۆتاسیۆم كە ڕێگری لە تینو بوون دەكات.

 

7- خواردنەوەى پەرداخێك شەربەتی لیمۆ و نەعنا یاخود چا گیاییەكان هەستی تێنوێتی كەمدەكەنەوە و سوود بە لەش دەبەخشن.

4203 جار خوێندراوەتەوە