شەش كاریگەری خراپی زۆر خواردنی فستق، ڕەنگە تائێستا دركت پێنەكردبێت

KNN : Kurdish News Network
08:50 - 02/03/2021
تەندروستی

خواردنی فستق چەندین سودی تەندروستی هەیە، لەوانە دابەزاندنی كێشی لەش سودەكانی بۆ دڵ و ڕیخۆڵەكان، بەڵام زیادەڕۆی كردن لە خواردنیدا سودەكانی دەگۆڕێت بۆ زیان، ئەوەش لەڕێی چەند توێژینەوەیەكەوە سەلمێندراوە.

 

 
فستق چەندین ماددەی خۆراكی بەسودی تێدایە، بەڵام زۆر كەس زیاد لەبڕی پێویست دەیخۆن، ئەوەش ڕەنگە هۆكاری توشبوون بێت بە چەندین كێشەی تەندروستی.

 

ماڵپەڕی بۆڵد سكای تایبەت بە هەواڵی تەندروستی، لە زاری پسپۆڕەكانەوە شەش دیاترین كاریگەری خراپی زۆر خواردنی فستقی خستۆتەڕوو كە بریتین لە:

 

زیادكردنی كێش

 
فستق یەكێكە لەو خۆراكانەی خواردنی ئاسانە، بۆیە كاتێك لەبەردەستی كەسێكدا دەبێت بڕێكی زۆری لێدەخوات، ئەوەش هۆكار دەبێت بۆ زیادبونی كێشی لەش، چونكە بڕێكی زۆر كالۆری تێدایە بەجۆرێك لە كوپێك فستقدا 700 كالۆری هەیە.

 

ڕیشاڵێكی زۆر

 ڕیشاڵەكانی پێكهاتەی فستق سودێكی زۆریان بۆ جوڵەی ڕیخۆڵەكان هەیە، بەڵام بەپێی چەندین توێژینەوەی پزیشكی زۆر خواردنی ڕیشاڵەكان زیانی دەبێت و ئەگەری توشبوون بە كێشەكانی قۆڵۆن زیاد دەكات، هەروەها لەچالاكییەكانی ڕیخۆڵە بۆ هەڵمژینی ماددە سود بەخشەكان كەمدەكاتەوە، بۆیە باشترە لە یەك كاتدا بڕێكی زۆری لێنەخورێت.

 


نەخۆشی سەلمۆنێلا

 
چەند توێژینەوەیەكی پزیشكی باسیان لەوەكردووە فستق بەكتریای سەلمۆنێلا تێدایە، كە زۆرترین كاریگەری لەسەر كەسانی بەتەمەن و منداڵان دروست دەكات و كۆئەندامی بەرگریان لاواز دەكات، هۆكارە بۆ توشبوون بە سكچون و بەرزبونەوەی پلەی گەرمی لەش لەگەڵ كێشەكانی كۆئەندامی هەرس.

 

ئەكریلامید

 فستق كاتێك دەبرژێندرێت، ئەگەری توشبوون بە بەكتریای سەلمۆنێلا كەمدەبێتەوە، بەڵام ئەو كردارە دەبێتە هۆی دروستبونی ماددەی ئەكریلامید، كە چەند توێژینەوەیەك بە بەرپرسیاری و هەندەری گەشەی خانە شێرپەنجەییەكانی دەزانن.
بەرزكردنەوەی فشاری خوێن

بڕێكی زۆر خوێ و سۆدیۆمی تێدایە، بۆیە زۆر خواردنی دەبێتە هۆی بەرزكردنەوەی فشاری خوێن و زیادكردنی ئەگەری توشبوون بە نەخۆشییەكانی دڵ و خانەكانی خوێن، چونكە 28.3 گرام فستق بڕی 121 میلیگرام سۆدیۆمی تێدایە.
بەردی گورچیلە
فستق یەكێكە لە چەرەساتە دەوڵەمەندەكان بە پۆتاسیۆم، هەروەها بونی خوێی ئەكسالات و میسیۆنین كە هۆكاری دروستبونی خوێی كالسیۆمن، ئەوانیش پێكەوە پێكهاتەیەكی سەرەكی دروستبونی بەردی بلوری گورچیلەن.

6251 جار خوێندراوەتەوە