لە رابردوودا (10) هەزار تاوانی جۆراوجۆر لە سنور هەولێر تۆمارکراوە، پۆلیس دەڵێت: لەسەر ئەو تاوانانە چوار هەزار کەس دەستگیرکراون.

 

 
عەمید دلێر نەجاڕ بەڕێوەبەری پۆلیسی پارێزگای هەولێر لە کۆنگرەیەکی رۆژنامەوانیدا رایگەیاند، لە ساڵی (2020)دا (10) هەزار و (861) تاوان لە سنوری پارێزگاکە ئەنجامدراون، لەسەر ئەو تاوانانەش چوار هەزار و (301) تۆمەتبار دەستگیرکراون و دراونەتە دادگا.

 

دەشڵێت: (32) حاڵەتی تەقەکردن هەبووە، کە (29) کەس لەسەر ئەو روداوانە، دەستگیرکراون.

 

ئاماژەی بەوەشکرد، هێزەکانیان توانیویانە (183) تۆمەتبار دەستگیربکەن، کە فەرمانی دەستگیرکردنیان هەبووە بە تاوانەکانی، کوشتن، دزی، بەکارهێنانی ماددەی هۆشبەر و چەندین تاوانی دیکە.

 

بە وتەی بەڕێوەبەری پۆلیسی هەولێر؛ لە ساڵی (2020)دا (65) حاڵەتی کوشتن تۆمارکراوە و (61) کەس لەسەر ئەو تاوانانە دەستگیکراون، هاوکات هەزار و (585) سواڵکەر و دەرۆزەکەریش، دەستگیرکراون.

 

وتیشی: لەماوەی ساڵی رابردو پێنج حاڵەتی هەڵکوتانە سەر نەخۆشخانەکان هەبوە و سەرجەم تۆمەتبارەکانیش دراونەتە دادگا، هەروەها دوو حاڵەتی هەڵکوتانە سەر دەرمانخانە و چوار حاڵەتی سەر هەڵکوتانە سەر کافتریا هەبون و لەلایەن پۆلیسەوە سەرجەم تۆمەتبارەکان دەستگیرکراون و دراونەتە دادگا.

170 جار خوێندراوەتەوە