هاوڵاتییەکى کوردى باکورى کوردستان لە کاتى هەوڵدان بۆ تێپەڕاندنى سنور و پەڕینەوە بۆ ئێران دەکەوێتە خەندەقێکە و لەلایەن گەلەگورگێکەوە دەکوژرێت.

ئاژانسى میزۆپۆتامیا لە هەواڵێکدا بڵاوى کردەوە، هاوڵاتییەکى کورد کە تەمەنى (28) ساڵە و دانیشتوى گوندێکى سەر سنورى قەزاى سەرای پارێزگاى وانە لە باکورى کوردستان، لە کاتى هەوڵدان بۆ تێپەڕاندنى سنور و پەڕینەوە بۆ ئێران دەکەوێتە ناو خەندەقى سنورى نێوان تورکیا و ئیران.

باسى لەوەشکردوە، دواى ئەوەى هاوڵاتییەکە دەکەوێتە ناوخەندەقەکە پەیوەندى تەلەفونى بۆ کەسوکارى دەکات تا بێن رزگارى بکەن، بەڵام کاتێک کەسوکارى دەگەنە شوێنەکە دەبینن لەلایەن گەلە گورگێکەوە هێرشى کراوەتەسەر و کوژراوە.

هاوڵاتییەکە ناوى عەدنان کاراهان بوە و باوکى چوار منداڵ بوە، دواتریش لەلایەن دەزگا ئەمنییەکانەوە تەرمەکەى رەوانەى پزیشکى دادى کراوە کە لەلایەن گورگەکانەوە پارچەکراوە.